Ja si do të zhvillohet procesi mësimor nga 1 tetori në Maqedoni

Viti shkollor mund të fillojë me model të kombinuar dhe gjithkund ku kushtet janë të plotësuara nga protokollet shëndetësore, mësimi do të realizohet me prani fizike në shkolla, pavarësisht klasës dhe moshës së fëmijëve, parasheh Plani për fillimin e vitit shkollor 2020/2021 nga 1 tetori që e miratoi sot Qeveria në seancën e saj të parë.

Plani i Ministrisë së Arsimit bazohet për nevojën që të merren përfitime maksimale për nxënësit, të punësuarit në shkolla dhe bashkësinë më të gjerë dhe njëherit të mos vijë deri në përhapjen e KOVID-19, tha në konferencën për shtyp ministrja e Arsimit dhe Shkencës, Mila Carovska.

Në këtë plan, sqaroi Carovska, ofrojmë model të kombinuar të mësimit.

“Komunave dhe shkollave u ofrojmë mundësi të organizojnë mësim onlajn në shkollat ku nuk plotësohen kushtet e parapara me protokoll për prani fizike në shkolla. Për realizim të suksesshëm të mësimit në largësi punohet në mënyrë të përshpejtuar të vendosjes së platformës së vetme kombëtare onlajn të cilën do ta prezantojmë shumë shpejtë në opinion. Megjithatë plani ofron opsion edhe për fillimin e mësimit dhe për praninë fizike të nxënësve pavarësisht moshës ose klasës dhe nëse bëhet fjalë për shkollë fillore ose të mesme ku kushtet e hapësirës e lejojnë këtë dhe është në pajtim me protokollet”, tha Carovska.

Ajo u bëri thirrje komunave t’i njoftojnë prindërit dhe mësimdhënësit t’i shqyrtojnë protokollet dhe mësimin e ofruar të kombinuar.

Gjatë llojit të tillë të mësimit në klasa do të marrin pjesë më së shumti 20 nxënës, me orë nga 30 minuta në shkollat fillore dhe nga 35 minuta në shkollat e mesme, pushim pesë minuta mes orëve.

Carovska dje pati takime të ndara me përfaqësuesit e Unionit të nxënësve të shkollave të mesme të cilët kërkojnë mësim të kombinuar, si dhe me Iniciativë të prindërve të cilët kërkojnë hapjen e shkollave.

Paraprakisht Unioni i nxënësve të shkollave të mesme mbajti protestë në Shkup për vitin shkollor më 1 tetor të fillojë menjëherë me model të kombinuar të mësimit, e jo onlajn, në komunat të cilat nuk kanë shumë të infektuar me koronavirus.