Tri raketa qëllojnë ambasadën amerikane në Bagdad, ka të plagosur

Të paktën tri raketa kanë goditur ambasadën amerikane në kryeqytetin e Irakut, Bagadad.

Një raketë ka goditur kafiterinë e ambasadës derisa dy të tjera kanë rënë në një distancë të afërt, i ka thënë një burim agjencisë së lajmeve, AFP.

Të paktën tre persona janë plagosur, kanë thënë për Reuters, disa burime të sigurisë.

Ky incident do të shënonte herën e parë në disa vjet që është plagosur stafi i ambasadës amerikane si pasojë e sulmeve të tilla.

Asnjë grup ende nuk e ka marrë përgjegjësinë, mirëpo Shtetet e Bashkuara në të kaluarën kanë fajësuar fraksionet ushtarake të përkrahura nga Irani në Irak.

Kryeministri irakian, Adel Abdul Mahdi e ka dënuar sulmin, duke thënë se vazhdimësia e sulmeve të ngjashme “e shtyn Irakut drejt kthimit në fushëbetejë”.

Departamenti amerikan i Shtetit ka thënë: “Ne i bëjmë thirrje Qeverisë së Irakut që të përmbushë obligimet e saj për të mbrojtur hapësirat diplomatike”.

Në sulmet e fundit janë sulmuar ose ambasada, ose baza ushtarake irakiane, nëpër të cilat ka staf të angazhuar amerikan.

Iraku është përfshirë së fundmi në përshkallëzim të tensioneve që ekzistojnë mes SHBA-së dhe Iranit.

Mes tjerash edhe për shkak të vrasjes së komandantit iranian, Qasem Soleimani nga forcat amerikane më 3 janar në Bagdad.

Forcat amerikane kanë vrarë edhe liderin e grupit militant, Kataib Hezbollah, Abu Mahdi al-Muhandis, që përkrahet nga Irani.

Kleriku i fuqishëm fetar, Moqtada al-Sadr ka organizuar protesta kundër SHBA-së, me qëllim të rritjes së presionit për largim të trupave amerikane nga Iraku. REL