“Shpërthen” mjeku: Politikanët kërkojnë dhoma VIP, ndërsa ne paguhemi 0.69 cent në orë

Bluzat e bardha janë në frontin e parë në përballje me koronavirusin, e megjithë lodhjen dhe përkushtimin e tyre, nuk marrin shpërblimin që meritojnë.

Këtë problematikë e ka ngritur dhe një mjek i Klinikës së Reumatologjisë në Kosovë, Enlirat Duraku, njëherësh edhe sekretar i përgjithshëm i Sindikatës së infermierëve, i cili është shprehur i irrituar lidhur me sfidat e mjekëve në kohën e pandemisë.

Duraku flet ashpër ndaj qasjes së politikanëve, që sipas të cilit kërkojnë dhoma VIP e aspak nuk tregojnë mirënjohje për punën e shërbyesve shëndetësorë.

“18€ paguhemi për një ndërrim nate ose më saktë 0.69 cent në orë! Pothuajse ato i shpenzojmë duke llogaritur ndërrimin e ditë dhe të natës, sepse mungojnë kushtet,” shkruan ai.

Reagimi

Infermierët dhe puna nën traumë psikologjike! 18€ paguhemi për një ndërrim nate ose më saktë 0.69 cent në orë ! Pothuajse ato i shpenzojmë duke llogaritur ndërrimin e ditë dhe të natës, sepse mungojnë kushtet. Le të jetë e ditur se as ujë të freskët nuk kemi, ndërsa etja pas mbajtjes deri në 6 orë pandërprerë të maskave dhe veshjeve mbrojtëse, është e tmerrësisht e madhe.

Pastaj ushqimi, një copë buke dhe një jogurt, eventualisht një copë mishi, të cilin gjatë përtypjes ka mundësi të fitosh “kallje të muskujve” të fytyrës. Në anën tjetër këta që po e mbështesin që pagesa të jetë 18€ ose që nuk reagojnë, qoftë politikan apo të tjerë, në rast se infektohen kërkojnë dhoma VIP si dhe kujdes maksimal infermieror.