Shaqiri i vendosur, kërkon shkëputjen e kontratës me Liverpoolin për të kaluar te Fenerbahce

Xherdan Shaqiri është i vendosur për t’u larguar nga skuadra e Liverpoolit gjatë kësaj vere. Madje, mësohet se Shaqiri ka kërkuar shkëputjen e kontratës me Liverpoolin për t’iu bashkuar Fenerbahçes, ekip me të cilin ka arritur marrëveshje në parim.

Kështu, ka shkruar sajti i njohur turk “Fotomaç” të enjten. Arsyeja që Shaqiri po kërkon shkëputjen e kontratës me Liverpoolin është kërkesa e lartë e ekipit anglez për ta liruar që të transferohet te Fenerbahçe.

Për ta lënë të lirë Shaqirin, Liverpooli të paktën po pretendon të marrë një ofertë mbi 20 milionë euro dëmshpërblim.

Shaqiri 28-vjeçar, ka kontratë me Liverpoolin deri në fund 2023 dhe në rast se shkëput kontratën, atëherë ai do t’i bashkohej Fenerbahçes si futbollist i lirë.

Fenerbahçe ka kohë që ka shprehur interesim për Shaqirin, të cilin e sheh si përforcim të madh për edicionin e ardhshëm.

Ai tashmë ka arritur marrëveshje personale me Fenerbahçen, por kërkesa e Liverpoolit për ta lënë të lirë po e pengon Shaqirin ta realizojë transferimin.

Si rezultat i kësaj, Fenerbahçe ka kërkuar nga Shaqiri të insistojë në shkëputjen e kontratës me Liverpoolin për t’u transferuar si futbollist i lirë ka shkruar ndër të tjera sajti i njohur nga Turqia.