Rama “përvesh mëngët” për zgjedhjet, takon krerët e bashkive

Kryeministri Edi Rama do të takojë sot në orën 11:00 kryetarët e bashkisë në ambientet e kryeministrisë.

Ky takim vjen një ditë pasi zhvilloi takim me deputetët e qarqeve ku dhe ka dhënë edhe disa udhëzime që kanë të bëjnë me zgjedhjet e ardhshme, ku ndër të tjera është shprehur se personalisht nuk është për lista të hapura.

Rama ka vënë në dijeni të vetët, se nuk do të ketë zgjedhjet të parakohshme lokale. Ai ka biseduar me ta në Sallën e Hartave në kryeministri për disa orë ku ka prekur edhe temën e koalicioneve parazgjedhore për të cilën tha se në zgjedhjet e ardhshme, mund të mos regjistrohen fare koalicione.

“Të vijohet me punën në terren, të jeni pranë njerëzve në këtë kohë pandemie. Deputetët tanë nuk mund të jenë me pushime në fundjavë. Duhet të jeni në terren. Të mos shkëputemi me njerëzit. Të mos kemi pushime. Duke qenë se shifrat e pandemisë nuk duken mirë, nuk duhet të fshihemi pas tyre për të mos shkuar në terren. Unë nuk besoj te listat e hapura. Por këtë është mendimi im personal. Këtë do t’a diskutojmë në Parlamnet. Ndryshimet në Kodin Zgjedhor dhe sistemim nuk i bëjmë dot vetëm. Duhen votat e opozitarëve”, ka thënë Rama.