Përplasje mes tifozave kuqezinj dhe Policisë pas humbjes së kombëtares, ironia me dasmën e Roshit

Nuk kanë munguar përplasjet në ambientet e jashtme të stadiumit mes tifozave pas humbjes 0-1 me Lituaninë. Një grup i “Tifozave Kuqezi” janë përplasur me punonjësit e policisë, të cilët më pas ndërhynë dhe shoqëruan në komisariat disa të rinj.

Në një reagim në rrjetet sociale “Tifozat Kuqezi” shprehen se ata ishin përpara stadiumit për të mbështetur skuadrën kombëtare në këtë moment të vështirë, dhe se kanë ndjekur të gjitha rregullat e distancimit.

Me ironi ata shprehen se do të ishte mirë që policia të kishte vepruar njësoj dhe në dasmën e një prej lojtarëve kuqezi Odise Roshi, i cili lidhi kurorë duke thyer rregullat e pandemisë që nuk lejojnë festat dhe grumbullimet.

“Pas ndeshjes disa prej anëtarëve tanë u arresuan në afërsi të stadiunit “Air Albania”. Kërkojmë lirimin e menjëhershëm të djemëve, të cilët u arrestuan për shkam se vajtën tek stadiumi për të përkrahur ekipin pas kësaj humbje katastrofale.

Ndonëse mbanin distancë dhe duke respektuar rregullat, ata u arrestuan pa as më të voglin shpjegim. Nëse policia do ishte kaq e rreptë si me ne për distancimin social të vepronte njëjtë dhe me dasmën e Odise Roshit ndoshta sot s’do ish nevoja të shkonim aty fare”, shkruajnë Tifozat Kuqezi në reagimin e tyre.

Ndeshja e djeshme ishte një nga më të dobëtat e Kombëtares në këto muajt e fundit, ndërsa pas ndeshjes tekniku Reja tha se e priste që të ishte një ndeshje e komplikuar, për shkak të gjendjes fizike të futbollistëve kuqezi.