Momenti i ekzekutimit të Hekuran Billës, sekuestrohen 17 kamera sigurie (VIDEO)

Ky është momenti i fundit i Hekuran Billës, ku u ekzekutua me 11 plumba 4 ditë më parë në zonën e Komunës së Parisit në kryeqytet.

Në pamje shihet automjeti benz me portobagazh, teksa autorët qëllojnë dhe më pas kthehen për t’u larguar në drejtim të Pezës aty ku edhe dogjën automjetin.

Policia në këtë zonë ku ndodhi vrasja, në Komunën e Parisit, ka bërë sekuestrimin e mbi 17 kamerave të sigurisë, ku grupi hetimor ka dalluar edhe një makinë të dytë për të cilën ka dyshime të forta se ka ndjekur lëvizjet e Hekuran Billës, dhe se personat që kanë qenë në të kanë pasur dijeni që viktima do të takonte një nga familjarët pranë qendrës tregtare aty ku u bë edhe ekzekutimi i tij.

Billa kishte vetëm 5 ditë që ishte kthyer nga Belgjika, por arsyet e udhëtimit të tij ende janë të paqarta.

Krahas disa pistave të hetimit, më kryesorja ku grupi hetimor është përqendruar është ajo e hakmarrjes, për shkak të të shkuarës së viktimës. Për këtë arsye policia ka shpallur në kërkim shkodranin Viktor Marku, pasi ai nuk është gjetur në shtëpi kur policia ka shkuar për t’a marrë në pyetje, si një nga të dyshuarit e vrasjes.

Ai është vëllai i Prel Marku, të riut që Hekuran Billa e ekzekutoi në vitin 2006 në një lokal në Angli, ndërsa la të plagosur tre persona të tjerë, Petrit Brahoj, Agron Gjoni dhe Musa Rrahmani.

Në 2007, Hekuran Billa u dënua në Angli me 32 vite burg, por në 2016, u ekstradua për të vuajtur pjesën e mbetur të dënimit, të cilin gjykata shqiptare ia kishte konverutuar në 25 vite burg.

Në shkurt të vitit 2019, gjyqtarja Enkeleda Hoxha, e liroi Billën, duke urdhëruar shërbim prove për të, për pesë vitet e ardhshme me kushtin që ai të rehabilitohej./tch