Izet Haxhia kallëzon në SPAK drejtorin e Burgjeve, Agim Ismaili

Izet Haxhia ka denoncuar në Porkurorinë e Posaçme (SPAK) drejtorin e Përgjithshëm të Burgjeve, Agim Ismajlin.

Me anë të një letre Haxhia shpjegon edhe arsyet e këtij denoncimi ku dhe pretendon se po torturohet. Ndër të tjera, në letër, ai shkruan se drejtori i Burgjeve, Agim Ismajli, shumë herë ushtron presion psikologjik mbi të, e fut në izolim dhe e keqtrajton.

Haxhia thotë se veprimet të tilla mund ta shtyjnë drejt vetëvrasjes.

“Po hakmerret në mënyrë primitive sipas meje, për arsyet e tij personale që unë i kam deklaruar botërisht. Në konventën ndërkombëtare të torturës, izolimi cilësohet si tortura më e rëndë. Si pasojë e këtij izolimi, gjendja ime psikologjike po rëndohet përditë e më shumë, gjendje e cila mund të agravojë deri në akte të rënda ndaj shëndetit tim fizik duke dëmtuar vetëveten. Siduket ky është qëllimi i këtij izolimi antinjerëzor dhe anti-ligjor.

Ky izolim i jashtëligjshëm po ushtrohet në mënyrë më të egër nga autoritetet i burgut me një qarkore të lëshuar nga Drejtoria e Burgjeve dhe e përsëritur nga Agim Ismaili, drejtor i tanishëm i Burgjeve. Kam kërkuar arsyen e këtij izolimi të paligjshëm dhe më është thënë në mënyrë shkresore se unë qenkam një person i rrezikshëm dhe prandaj mbahem në izolim të egër. Unë nuk kam qenë asnjëherë person me rrezikshmëri, epitet të cilin ma ka vendosur politika dhe mediat në porosi të politikës.

Mendoj që ky izolim është anti-njerëzor, kufizimi i të drejtës së komunikimit, provokimet e vazhdueshme, dhuna psikologjike, sjellja terroriste dhe harbute e Forcave Operacionale të Drejtorisë. Kam kërkuar shumë herë nga autoritetet e burgut që të hiqet izolimi, përgjigjet janë qenë negative, duke u justifikuar se është një urdhër i drejtorit të përgjithshëm të Burgjeve, Agim Ismaili i cili nuk denjon as t’i përgjigjet kërkesës sime të ligjshme për heqjen e këtij izolimi i cili po më shkarkon fizikisht dhe mendërisht,”– shkruhet ndër të tjera në letrën e Izet Haxhisë.

Izet Haxhia ndodhet në qeli për vrasjen e Azem Hajdarit, ai u dënua pak muaj më parë me 25 vite burg për këtë krim.