Arrestohet drejtori i bankës, i vodhi 30 000 USD klientit

Policia e Tiranës ka finalizuar operacionin policor të koduar “Bankieri”, duke arrestuar një 35 vjeçar i cili ka vjedhur një shumë parash në llogarinë rrjedhëse të një klienti.

Siç raporton abcnews.al, bëhet fjalë për 35 vjeçarin Florant Nako, i cili ka qenë drejtori i një filiali të një banke të nivelit të dytë në Tiranë.

35 vjeçari e ka kryer vjedhjen katër muaj më parë dhe më pas është larguar nga detyra duke shkuar në SHBA. Që kur është konstatuar vjedhja ai është mbajtur nën vëzhgim nga agjentët e policisë deri në arrestimin sëfundmi.

Dyshohet se ai ka ndërhyrë edhe në llogari të tjera, megjithatë policia është duke kryer procedurat e nevojshme për verifikimin e plotë të veprimtarisë së paligjshme të ish-drejtorit.

Njoftimi i policisë
Nga Seksioni për Krimin Ekonomik dhe Financiar, në bashkëpunim me Prokurorinë e Rrethit Gjyqësor Tiranë, si rezultat i një hetimi disamujor është bërë i mundur finalizimi i operacionit të koduar “Bankieri”, në kuadër të cilit u bë kapja dhe ndalimi i shtetasit F. N., 35 vjeç, banues në Tiranë.

Ky shtetas, duke shfrytëzuar pozicionin e tij si drejtor i një filiali të një banke të nivelit të dytë, ka vjedhur në llogarinë rrjedhëse të një klienti, një shumë prej 30.000 dollarësh amerikanë.

Materialet i kaluan Prokurorisë, për veprime të mëtejshme, për veprën penale “Vjedhja e kryer duke shpërdoruar detyrën” .