Dy mjekët e Sanatoriumit u infektuan me koronavirus, si e fshehu pacienti udhëtimin në Itali

Zëvendës ministrja e Shëndetësisë, Mira Rakacolli ka dalë në një deklaratë për mediat ku ka sqaruar si u infektuan dy mjekë të Sanatariumit me koronavirus, ndërsa tha se ata janë infektuar nga një person, që ka fshehur udhëtimin në Itali.

“Në lidhje me personelin mjekësor që punon në Spitalin Mjekësor të Sëmundjeve Infektive në “Shefqet Ndroqi”, dua të sqaroj publikun se Instituti i Shëndetit Publik është duke kryer një hetim të plotë epidimiologjik të rastit. Njëri prej pacientëve që aktualisht po trajtohet në Spitalin Infektiv, ka qenë i shtruar në spitalin “Shefqet Ndroqi”.

Sipas të dhënave, nga gjurmimi i kryer, ky pacient është vizituar në spital nga një i afërm, që vinte nga Italia, nga zonat e prekura dhe nuk e ka dhënë këtë informacion në stafet mjekësore.

Pas identifikimit të rastit, është kryer menjëherë testimi i mjekëve dhe aktualisht janë testuar 17 personel shëndetësor, nga të cilët një mjeke dhe një teknik i shkencave mjekësore kanë rezultuar pozitiv. Të dy janë vetëizoluar dhe gjendja e tyre paraqitet e mire”, tha Rakacolli.