Dy fëmijë të infektuar me koronavirus në Shqipëri, çfarë thonë mjekët

Në vendin tonë janë aktualisht dy fëmijë të prekur me koronavirus.

Për këtë ka treguar detaje shefja e pavionit të pediatrisë.

“Në vendin tonë kemi të testuar nga kontaktet një pjesë të mirë të fëmijëve nga të cilët vetëm dy fëmijë, të moshës 0-14 vjeç, kanë rezultuar pozitivë. Njëri pa shenja të sëmundjes, ndërsa tjetri me shenjat e një temperature të kontrollueshme, po trajtohet në shtëpi, nuk ka nevojë për shtrim në spital”, deklaroi Kuli.

Sipas Kulit, nëse do të ketë raste të fëmijëve që do të shtrohen në spital, “fëmijët do të kenë pavion të tyre, me hyrje të veçantë, krejtësisht i izoluar nga pjesa tjetër e spitalit”.

“Fëmijët janë njësoj të ekspozuar dhe mundësinë e infektimit e kanë njësoj si gjithë popullata tjetër. Nga rastet që referohen në botë dhe komunikimi që kemi ne me 90 shoqata pediatrike të botës, referohen raste të fëmijëve të infektuar por fatmirësisht në 90% të rasteve këto janë pa shenja, ose forma të lehta apo moderuara që kalojnë në kufijtë e një infeksioni viral të zakonshëm”, tha mjekja.