Kosova niset sot drejt Shkupit për ndeshjen historike ndaj Maqedonisë

Kombëtarja e Kosovës sot do të udhëtojë drejt Shkupit ku të enjten e zhvillon ndeshjen kryesore të saj kundër Maqedonisë së Veriut në kuadër të play-off të gjysmëfinales së Ligës së Kombeve për kualifikim në Kampionatin Evropian

Dardanët drejt qytetit të Shkupit nisen sot nga ora 10:30 nga hoteli ku po qëndrojnë në kryeqytet, derisa rrugën e marrin me shumë mungesa në përbërje por shumë të motivuar dhe optimist për fitore.

Kosova do ta mbajë sonte një stërvitje në stadiumin “Todor Proeski”, aty ku nesër zhvillohet ndeshja nga ora 20:45.

Trajneri i Kosovës, Bernard Challandes, nuk mund të llogarisë në lojtarët kyçë si Vedat Muriqi, Milot Rashica, kapiteni Amir Rrahmani, Hekuran Kryeziu dhe Idriz Voca.

Ndryshe, në pikën kufitare të Hanit të Elezit tifozët dardanë kanë organizuar përcjellje për yjet tanë për ndeshjen më të rëndësishme pas katër viteve formimi.