Hoti: Në Bruksel do të ketë vetëm njohje reciproke me Serbinë

Kryeministri i Kosovës, Avdullah Hoti ka thënë se do të bisedojnë me palën serbe për marrëveshje përfundimtare për njohje reciproke dhe normalizim të marrëdhënieve, të hënën në Bruksel.

Përmes një postimi në Facebook, ai thotë se marrëveshja me Serbinë arrihet vetëm atëherë kur përmbyllet me njohje reciproke.

Kritika mbi Marrëveshjen e arritur në Uashington me Serbinë për stabilizim ekonomik, ka pasur nga opozita por edhe nga bashkëpartiakja e kryeministrit, Vjosa Osmani.

Postimi i plotë i Hotit:

Bazuar në zotimet që i kemi dhënë në Samitin e Parisit më 10 korrik 2020, si dhe mbështetjen që kemi marrë nga Presidenti Makron dhe Kancelarja Merkel, të hënën në Bruksel e takojmë palën serbe për të dialoguar për marrëveshjen përfundimtare për njohje reciproke dhe normalizim të marrëdhënieve në mes të Kosovës dhe Serbisë.

Marrëveshja arrihet vetëm atëherë kur përmbyllet me njohje reciproke. Nuk do të ketë marrëveshje të ndërmjetme, parciale apo kreative që nuk e zgjidh problemin përgjithmonë. Do të ketë vetëm marrëveshje përfundimtare për njohje reciproke, që është sistematike dhe ku përfshihen të gjitha çështjet që duhet të adresohen në mes të dy vendeve të pavarura duke u bazuar në konventat, standardet dhe praktikën ndërkombëtare të rregullimit të marrëdhënieve në mes të dy vendeve të pavarura.

Kosova mbetet e përkushtuar për paqe, stabilitet, zhvillim dhe integrim euro-atlantik të të gjithë regjionit.