Volkswagen synon të nxjerrë në Kinë automjete autonome të Nivelit 3 nga viti 2027

Volkswagen synon që në gjysmën e dytë të vitit 2027 të nisë në Kinë dorëzimin e automjeteve të para me teknologji autonome të Nivelit 3. Këto makina do t’u mundësojnë drejtuesve t’ia kalojnë automjetit kontrollin e plotë në rrethana të caktuara, njoftoi të mërkurën prodhuesi gjerman.

Me lançimin e parashikuar për vitin e ardhshëm, kompania më e madhe automobilistike në Evropë kërkon të ngushtojë diferencën në tregun që po zhvillohet me shpejtësi të teknologjive të drejtimit autonom.

Në funksion të këtij projekti, Volkswagen po thellon bashkëpunimin me kompaninë kineze të teknologjisë Horizon Robotics. Carizon, sipërmarrja e përbashkët e krijuar nga dy kompanitë në vitin 2022, do të ketë qasje në modelin e inteligjencës artificiale të Horizon Robotics. Sipas Volkswagen, kjo do të ndihmojë në përshpejtimin e zhvillimit të sistemeve për drejtim autonom.

Teknologjia e Nivelit 3 u jep mundësi shoferëve që, në situata të përcaktuara qartë, përfshirë lëvizjen në autostrada, të largojnë duart nga timoni dhe të mos e mbikëqyrin përkohësisht trafikun, ndërsa makina merr tërësisht drejtimin.

Kina po konsolidohet si një nga vendet udhëheqëse në përfshirjen e kësaj teknologjie në automjetet e tregut masiv. Disa prodhues kanë nisur tashmë testimin e sistemeve të tilla në rrugë publike, ndërsa një sërë qytetesh kineze ofrojnë edhe shërbime robotaksi që funksionojnë plotësisht pa shofer.

Plani i Volkswagen për të futur Nivelin 3 në tregun kinez tregon se tregu më i madh automobilistik në botë po vendos ritmin për funksionet e drejtimit që nuk kërkojnë vëmendjen e vazhdueshme të shoferit. Kjo dinamikë po i nxit prodhuesit e huaj të mbështeten te partneritetet me kompani teknologjike vendase për të ruajtur konkurrueshmërinë.

Në Gjermani, Mercedes-Benz dhe BMW kishin ofruar më herët funksione të Nivelit 3 në disa prej modeleve të tyre kryesore, por që të dyja kompanitë i kanë ndërprerë më pas këto programe, sipas DPA News.