TikTok pranon të paguajë 400 milionë dollarë në SHBA për shkeljen e privatësisë së fëmijëve

Një marrëveshje prej 400 milionë dollarësh është arritur mes TikTok-ut dhe autoriteteve amerikane për mbylljen e një padie që e akuzonte platformën për shkelje të privatësisë së fëmijëve. Bëhet fjalë për një nga kompensimet më të mëdha të dhëna ndonjëherë për këtë lloj çështjeje.

Procedura ligjore nisi me padinë e Departamentit të Drejtësisë së SHBA-ve në vitin 2024, gjatë administratës së Joe Biden. Sipas pretendimeve, TikTok dhe kompania mëmë ByteDance kishin grumbulluar “sasi të mëdha të dhënash” nga miliona përdorues nën moshën 13 vjeç.

Autoritetet amerikane e konsideruan këtë praktikë shkelje të Ligjit për Mbrojtjen e Privatësisë së Fëmijëve në Internet, i njohur si COPPA, i miratuar në vitin 2000. Në bazë të të njëjtit ligj, dhjetëra shtete amerikane kanë ngritur padi edhe ndaj Meta-s.

“Fëmijët dhe prindërit janë më të mbrojtur sot nga sa ishin kur filloi kjo çështje”, deklaroi ndihmësprokurori i përgjithshëm Brett Shumate.

Lista e kompanive që janë ndëshkuar financiarisht nga qeveria amerikane për shkelje të COPPA-s përfshin edhe YouTube-in e Google. Në vitin 2019, platforma pagoi 170 milionë dollarë, ndërsa Epic Games u gjobit me 275 milionë dollarë në vitin 2022.

Ndërkohë, Meta mund të përballet me gjoba që arrijnë në qindra miliarda dollarë pas akuzave për shkelje të COPPA-s, të ngritura nga prokurorët e përgjithshëm të 29 shteteve amerikane. Gjyqi me juri për këtë rast nisi këtë javë, ndërsa pronari i Instagram-it dhe Facebook-ut akuzohet se ka synuar fëmijët si përdorues dhe ka nxjerrë përfitime financiare prej tyre.

Padia kundër TikTok-ut ishte ngritur përpara ndarjes, vitin e kaluar, të biznesit dhe operacioneve të platformës në SHBA nga baza e saj fillestare në Kinë. Megjithatë, marrëveshja e arritur mbulon vetëm operacionet e TikTok-ut në Kinë.

ByteDance, kompania private që zotëron TikTok-un, është vlerësuar së fundmi nga investitorët me 550 miliardë dollarë.