Tesco sjell teknologjinë me inteligjencë artificiale për provimin virtual të veshjeve

Tesco ka nisur testimin e një sistemi që u mundëson klientëve të shohin në mënyrë virtuale se si do t’u përshtaten veshjet e markës F&F, pa qenë e nevojshme t’i veshin fizikisht.

Teknologjia po provohet në dyqanin Sandhurst Extra dhe mbulon rreth 1,500 artikuj për gra dhe burra.

Përmes një ekrani të vendosur në zonën e veshjeve, përdoruesit mund të fotografojnë veten, të ngarkojnë një imazh që e kanë tashmë ose të zgjedhin një model digjital që përputhet me masën e tyre.

Pas këtij hapi, sistemi i bazuar në inteligjencën artificiale paraqet një pamje të mundshme të mënyrës se si do të dukej veshja në trupin e klientit.

I njëjti ekran ofron edhe të dhëna për çmimet, masat, stokun dhe mundësinë e gjetjes së artikujve në dyqane të tjera.

Shërbimi i ri vjen pas ankesave të shumta të klientëve, të cilët kanë vënë në dukje mungesën e dhomave të provës në disa prej dyqaneve Tesco.

Një kliente madje kishte pyetur me shaka në rrjetet sociale nëse kompania do të vendoste ndonjëherë dhoma provash, pasi ishte detyruar të provonte një palë pantallona në hapësirën e shitjes.

Megjithëse Tesco njihej kryesisht për shitjen e qumështit, bukës dhe artikujve të përditshëm, vitet e fundit kompania është kthyer edhe në një adresë të rëndësishme për blerjen e rrobave.

Seksioni F&F Clothing është bërë veçanërisht i kërkuar, ndërsa prova virtuale është pjesë e një rikonstruksioni më të gjerë të këtij sektori në Sandhurst Extra.

Riorganizimi përfshin dhoma të reja prove, një hapësirë të posaçme për pagesat dhe kthimet, si edhe një përzgjedhje më të gjerë produktesh.

Dyqani është pajisur gjithashtu me tabela të reja, ndriçim më të mirë dhe një organizim të ri të koleksioneve për gra, burra dhe fëmijë.

Testimi zhvillohet në një periudhë kur supermarketet po fitojnë terren si destinacione për veshje, ndërsa konsumatorët po largohen gjithnjë e më shumë nga markat tradicionale të modës në qendrat tregtare.

F&F ka marrë vëmendje edhe përmes bashkëpunimeve me figura të njohura publike, mes të cilave Zara McDermott dhe Abbey Clancy, të cilat kanë prezantuar koleksione në partneritet me markën e Tesco-s.

Në TikTok dhe në platforma të tjera sociale, blerësit kanë publikuar video me produktet e tyre dhe kanë vlerësuar çmimet dhe modelet e ofruara.

Disa prej tyre janë shprehur se janë “të fiksuar” pas koleksioneve të F&F, duke veçuar kostumet e kombinuara, fundet, xhaketat dhe kardiganët.

Ndërkohë, koleksionet sezonale janë cilësuar nga përdorues të tjerë si elegante dhe të përshtatshme për përdorim të përditshëm.

Me këtë risi, Tesco synon të ndërthurë çmimet e përballueshme me një mënyrë më moderne dhe praktike të blerjes së veshjeve. /GazetaExpress/