Samsung ironizon iPhone Duo pas prezantimit: “Na njoftoni kur të përfundoni kopjimin e ideve tona

https://www.dailymail.com/embed/video/3709653.html

Samsung Mobile US reagoi në platformën X me një koment ironik: “Na tregoni kur të mbaroni së ringrohuri mbetjet tona.”

Samsung: Funksionet na duken të njohura

Kompania koreano-jugore u tall edhe me një nga përdorimet e veçanta të reklamuara nga Apple: mundësinë për ta lënë iPhone Duo pjesërisht të hapur dhe për ta përdorur si orë digjitale pranë shtratit.

“Jo edhe ora pranë shtratit. Po na duket si ‘Groundhog Day’”, shkroi Samsung, duke lënë të kuptohet se një funksion i tillë është parë më herët në pajisjet e saj.

Ironia e Samsung u lidh veçanërisht me ngjashmëritë mes iPhone Duo dhe Samsung Galaxy Z Fold8, i cili ishte prezantuar më herët gjatë këtij viti.

Të dy modelet kanë një trup relativisht të shkurtër e të gjerë, ekran të brendshëm 7.6 inçësh dhe raporte shumë të përafërta të pamjes.

Galaxy Z Fold8 vjen me ekran të jashtëm 5.5 inçësh dhe ka trashësi 4.5 mm kur është i hapur. iPhone Duo, ndërkohë, ka ekran të jashtëm 5.4 inçësh dhe trashësi 5.2 mm.

Samsung vijoi me një tjetër batutë: “Po na duket shumë familjare. Është ky ndonjë vazhdim i The Sims?”

Më pas kompania shtoi: “Na latë të prisnim? Në rregull. Ne ndërkohë do të palosemi në tri pjesë.”

Kjo deklaratë iu referua Galaxy Trifold, telefonit të Samsung që paloset në tri pjesë dhe që pati një lansim të kufizuar në Korenë e Jugut vitin e kaluar.

Reagime të ndara nga përdoruesit

Postimet e Samsung shkaktuan menjëherë diskutime në rrjetet sociale, ku përdoruesit u pozicionuan në të dyja kampet.

“Apple do t’ju kërkojë 2,000 dollarë për një telefon të palosshëm që Samsung e ka përmirësuar për shtatë gjenerata dhe njerëzit përsëri do ta quajnë revolucionar”, shkroi një komentues.

Një tjetër përdorues u shpreh: “Apple erdhi në festë shtatë vjet me vonesë dhe po e quan inovacion.”

Megjithatë, pati edhe nga ata që e kritikuan mënyrën e reagimit të Samsung. Një përdorues e përshkroi sjelljen e kompanisë si atë të “një ish-partneri toksik pas ndarjes”, ndërsa një tjetër shkroi: “Samsung po kalon një krizë nervore tani.”

Duolingo dhe Chipotle iu bashkuan shakave

Samsung nuk ishte e vetmja kompani që komentoi me humor prezantimin e Apple. Aplikacioni për mësimin e gjuhëve Duolingo luajti me emrin “Duo”, që është edhe emri i maskotës së tij.

Në X, Duolingo publikoi mesazhin: “iPhone Duo: 1,999 dollarë. Duo në iPhone-in tuaj: falas.”

Edhe zinxhiri amerikan i restoranteve Chipotle reagoi duke publikuar një video ku mbështillej një burrito, shoqëruar me fjalinë: “Ne kemi teknologji të palosshme prej vitesh, meqë ra fjala.”

Apple thotë se ka reduktuar rrudhën e ekranit

Përtej humorit dhe përplasjeve në rrjetet sociale, iPhone Duo synon të konkurrojë drejtpërdrejt me modelet premium të palosshme që janë aktualisht në treg.

Apple e ka veçuar si një nga avantazhet kryesore përpjekjen për ta zvogëluar ndjeshëm rrudhën që krijohet në zonën ku paloset ekrani.

Ben Wood, themelues i CCS Insight, tha se modeli i ri duket se ka përfituar nga zhvillimet e rëndësishme në cilësinë dhe rezistencën e ekraneve fleksibile.

“Një shembull i mirë është ekrani pothuajse pa rrudhë, i cili, sikurse Galaxy Z Fold8, përdor një pllakë titani nën ekran”, tha ai.

https://www.dailymail.com/embed/video/3709539.html

Wood theksoi gjithashtu si dallim përfundimin nano-texture të ekranit, një teknologji që Apple e ka përdorur më parë edhe në MacBook Pro.

Sipas tij, kjo teknologji duhet ta përmirësojë lexueshmërinë në ndriçim të fortë, ta bëjë sipërfaqen më rezistente ndaj njollave dhe ta minimizojë më tej dukshmërinë e vijës së palosjes.

Pajisja mund të përdoret në pozicione të ndryshme

Apple deklaron se mentesha e re është projektuar për lëvizje të butë dhe për t’i shtuar qëndrueshmëri telefonit.

iPhone Duo mund të përdoret i shpalosur plotësisht, i palosur pjesërisht ose në një pozicion të ndërmjetëm.

Ai mund të lihet gjysmë i hapur për të parë video pa e mbajtur në dorë, ndërsa në një pozicion tjetër mund të shërbejë si një libër pjesërisht i palosur.

Telefoni do të ofrohet në dy ngjyra, Night Sky dhe Star White, dhe do të ketë trup prej titani.

Çmimi në Britani varion nga 1,999 deri në 3,199 funte, ndërsa në SHBA nga 1,999 deri në 3,199 dollarë. Kjo e bën iPhone Duo telefonin më të shtrenjtë të lançuar ndonjëherë nga Apple.

Hyrja e Apple në këtë segment, pavarësisht ironive dhe rivalitetit publik, pritet të rrisë më tej konkurrencën me Samsung në tregun premium të pajisjeve të palosshme. /GazetaExpress/