Rama, jep dorëheqjen!” Protesta kundër kryeministrit hyn në ditën e 63-të, me pjesëmarrje edhe nga Gjermania e Anglia

Për më shumë se 60 vjet, Avtar Singh jetoi pa e ditur se çfarë kishte ndodhur me nënën e tij biologjike.

Ndërkohë, në një tjetër pjesë të botës, Nicci Dhamu përpiqej prej vitesh të gjente vëllain e saj të madh, të cilin nëna e kishte humbur kur ai ishte ende fëmijë. Rrugët e tyre u kryqëzuan në mënyrë të befasishme falë ChatGPT-së.

Avtar kishte lindur në Indi dhe ishte rritur nga gjyshërit. Kur ishte nëntë vjeç, ai u nis drejt Kanadasë për t’u bashkuar me të atin, ndërsa mendonte se gruaja që e priti ishte nëna e tij.

Vetëm pas shumë vitesh kuptoi se ajo ishte njerka e tij dhe se nëna biologjike quhej Savinder. Megjithatë, nuk arriti të mësonte se ku ndodhej ajo. Për dekada me radhë kërkoi në internet, në arkiva dhe përmes mediave, por përpjekjet e tij nuk dhanë rezultat.

Gjatë një qëndrimi në Francë, në maj të këtij viti, ai vendosi të kërkonte ndihmë nga ChatGPT.

“Mendova se nuk më kishte mbetur asgjë pa provuar. Pse të mos i jepja një shans edhe inteligjencës artificiale?”, kujton ai, sipas The Guardian.

Duke përdorur informacionin e kufizuar që Avtar kishte për nënën e tij, ChatGPT i shfaqi një artikull për Savinder Kaur Nagi. Shkrimin e kishte përgatitur Nicci Dhamu në kujtim të nënës së saj, e cila kishte vdekur në vitin 2024.

Pa qenë i bindur se kishte gjetur gjurmën e saktë, Avtar i dërgoi një mesazh autores së artikullit.

Pak orë më pas, të dy zhvilluan një telefonatë që do t’ua ndryshonte jetën.

Avtar e pyeti nëse Savinder kishte pasur fëmijë, ndërsa Nicci i tha se ajo kishte një djalë.

Pak më vonë, Nicci e pyeti: “Titu, je ti?”, duke përdorur nofkën e njohur vetëm nga familjarët e tij.

“Po, jam unë”, u përgjigj Avtar. “Nuk ma kishte thënë askush atë nofkë që kur isha fëmijë.”

Brenda disa ditësh, Avtar shkoi në Londër. Atje takoi për herë të parë motrën, xhaxhain dhe familjarët e tjerë nga ana e nënës.

Së bashku, ata rikthyen në kujtesë historinë e Savinderit. Pas një martese të dështuar, ajo ishte detyruar të ndahej nga i biri, por nuk kishte reshtur kurrë së menduari për të.

Edhe pse ribashkimi u mundësua nga ChatGPT, Avtar e sheh me realizëm kontributin e inteligjencës artificiale.

“Për momentin, AI mbetet një motor kërkimi i avancuar. Ajo gjeti përputhjen më të mirë bazuar në informacionin që i dhashë. Nuk ka inteligjencë në këtë proces”, tha ai.

Për Nicci-n, kjo histori ka një domethënie shumë më të ndjerë.

“Kush mund ta kishte imagjinuar se ChatGPT do të gjente një artikull, artikulli do të çonte te një email dhe emaili te e gjithë kjo? Edhe inteligjenca artificiale mund të ketë një anë njerëzore. Mjafton të shihni se çfarë ndodhi”, u shpreh ajo.