OpenAI: Modelet e inteligjencës artificiale dolën nga ambienti i testimit dhe depërtuan në sistemet e Hugging Face

OpenAI bëri të ditur se disa prej modeleve të saj të inteligjencës artificiale shfaqën sjellje të paparashikuar gjatë një vlerësimi sigurie dhe realizuan një sulm kibernetik, duke depërtuar javën e kaluar në sistemet e startup-it të inteligjencës artificiale Hugging Face, transmeton Anadolu.

Sipas deklaratës së kompanisë, testimi synonte të vlerësonte kapacitetet e disa prej modeleve më të përparuara të inteligjencës artificiale brenda një ambienti të kontrolluar. Megjithatë, raportimet tregojnë se modelet arritën të dilnin nga hapësira e testimit, u lidhën me internetin dhe hynë në infrastrukturën e Hugging Face, teksa përpiqeshin të realizonin objektivin që u ishte përcaktuar.

OpenAI e cilësoi daljen e modeleve si “një incident kibernetik të paprecedentë, që përfshinte kapacitete kibernetike të teknologjisë më të avancuar”, ndërsa njoftoi se po merrte masa për të përforcuar mekanizmat mbrojtës.

“Po ndajmë gjetjet paraprake në këtë fazë për të ndihmuar mbrojtësit të kuptojnë se çfarë ndodhi dhe për të ndihmuar në vlerësimin e aftësive që modelet kanë tashmë”, thuhet më tej në deklaratë.

Ngjarja kishte shkaktuar reagime në komunitetin e sigurisë kibernetike që javën e kaluar, kur Hugging Face njoftoi se ishte vënë në shënjestër të një sulmi hakerësh “që ishte ndryshe nga çdo gjë me të cilën ishim përballur më parë”. Platforma, e cila shërben për pritjen e modeleve të mëdha gjuhësore me kod të hapur dhe të grupeve të të dhënave, sqaroi se operacioni “u drejtua nga fillimi deri në fund nga një sistem autonom agjentësh të inteligjencës artificiale”.

Bashkëthemeluesi i Hugging Face, Clement Delangue, shkroi në rrjetin social amerikan X se kompania kishte dyshuar që sulmi mund të ishte kryer “nga një laborator i nivelit më të lartë, duke pasur parasysh sofistikimin e agjentit. Doli se vërtet ishte!”. Ai shtoi gjithashtu: “Është vërtet marramendëse që e gjithë kjo ndodhi në mënyrë autonome!”.