OpenAI dhe Google u ofruan AI të avancuar filialeve në Singapor të Alibaba, Baidu dhe Tencent, ngrihen pikëpyetje në SHBA

OpenAI dhe Google kanë vënë në dispozicion modele të avancuara të inteligjencës artificiale për degë me bazë në Singapor të kompanive kineze Alibaba, Baidu dhe Tencent, të cilat Pentagoni i ka futur në listën e subjekteve që dyshohet se kanë lidhje me ushtrinë kineze.

Financial Times raportoi se ky rast ka nxjerrë në pah mangësi në përpjekjet e Uashingtonit për të kufizuar zhvillimin e inteligjencës artificiale në Kinë.

Edhe pse këto shitje nuk bien ndesh me ligjin amerikan, ato kanë rikthyer diskutimin nëse duhen vendosur kufizime të ngjashme me ato që SHBA-të kanë zbatuar për eksportin e çipave të avancuar që përdoren për trajnimin e modeleve të AI-së.

Administrata amerikane ka vendosur kontrolle ndaj disa modeleve të avancuara të inteligjencës artificiale, por deri tani nuk e ka ndaluar përdorimin e tyre nga kompani kineze, edhe kur ato janë pjesë e të ashtuquajturës listë 1260H, ku përfshihen subjekte që dyshohet se bashkëpunojnë me Ushtrinë Çlirimtare Popullore të Kinës.

Chris McGuire, ekspert i teknologjisë dhe sigurisë në Council on Foreign Relations, u shpreh se administrata amerikane flet vazhdimisht për garën me Kinën në inteligjencën artificiale, por sipas tij nuk ka marrë masa reale për kontrollin e eksporteve, që ai e konsideron mjetin kryesor për të ngadalësuar përparimin e Pekinit.

Pas pyetjeve të Financial Times, OpenAI konfirmoi se muajin e kaluar kishte ndërprerë aksesin në API për përdorues të lidhur me Alibaba, për shkak të dyshimeve se teknologjia po përdorej në mënyrë të paligjshme.

Sipas OpenAI, bllokimi erdhi pas dyshimeve për të ashtuquajturin “distilim”, praktikë në të cilën rezultatet e prodhuara nga një model i avancuar shfrytëzohen për të trajnuar ose përmirësuar modele rivale.

Kompania bëri të ditur gjithashtu se ky aktivitet ishte raportuar edhe pranë autoriteteve amerikane.

OpenAI nënvizoi se modelet e saj nuk ofrohen në Kinë, por pranoi se disa kompanive me pronësi ose seli kineze u lejohet përdorimi i tyre në vende ku kompania mund të monitorojë përdorimin dhe të zbatojë masa mbrojtëse.

“Ne do të preferonim që më shumë vende të përdornin inteligjencë artificiale të ndërtuar mbi vlera demokratike, sesa sisteme të kontrolluara nga qeveri autokratike”, deklaroi kompania, duke shtuar se “kombësia, e vetme, nuk duhet të jetë kriter për të kufizuar aksesin”.

Nga ana tjetër, Google tha se shërbimet e saj të inteligjencës artificiale ofrohen në Hong Kong dhe Singapor, në përputhje me politikat e përdorimit të kompanisë, të cilat ndalojnë edhe praktikën e “distilimit”. Megjithatë, kompania pranoi se kufizimet gjeografike nuk mjaftojnë për të shmangur abuzimet, pasi aktorë të sofistikuar mund t’i anashkalojnë ato.

Alibaba nuk bëri koment të menjëhershëm për raportin. Muajin e kaluar, kompania kërkoi në një gjykatë amerikane që Pentagoni të urdhërohej ta hiqte nga lista 1260H, duke e cilësuar përfshirjen si “arbitrare dhe të pajustifikuar”.

Baidu nuk pranoi të komentojë, ndërsa Tencent nuk iu përgjigj pyetjeve lidhur me mënyrën se si i përdor modelet amerikane të inteligjencës artificiale.

Në ndryshim nga OpenAI dhe Google, Anthropic ka ndaluar që modelet e saj të avancuara të përdoren nga kompani kineze dhe filialet e tyre jashtë vendit. Megjithatë, edhe kjo kompani ka pranuar se zbatimi i një ndalimi të tillë mbetet i vështirë.

Javën e kaluar, Anthropic mori masa për të mbyllur boshllëqet që, sipas saj, po përdoreshin nga disa kompani kineze për të anashkaluar kufizimet.

Më herët, Anthropic ka akuzuar laboratorët kinezë të inteligjencës artificiale DeepSeek, Moonshot dhe MiniMax se kanë përdorur teknikën e “distilimit”.

Muajin e kaluar, kompania i tha Kongresit amerikan se Alibaba kishte përdorur rreth 25 mijë llogari të rreme për të gjeneruar mbi 28.8 milionë ndërveprime me modelin Claude, në kundërshtim me kushtet e përdorimit.

Joe Khawam, ekspert i politikave të inteligjencës artificiale dhe sigurisë kombëtare, ka argumentuar se SHBA-të duhet të ashpërsojnë kontrollet për eksportin e teknologjive të AI-së, në mënyrë që laboratorët kinezë të mos përfitojnë nga aftësitë më të avancuara amerikane pa mbajtur kostot e zhvillimit, inxhinierisë dhe sigurisë.

Sipas tij, një situatë e tillë rrezikon të dëmtojë bazën ekonomike të lidershipit amerikan në fushën e inteligjencës artificiale.