Mbetjet e raketës SpaceX pritet të godasin Hënën, NASA siguron se Toka nuk rrezikohet

Mbetjet e një rakete SpaceX, të cilat prej kohësh enden pa kontroll në hapësirë, pritet të godasin Hënën pasi kanë lëvizur në orbitë me një shpejtësi prej rreth 2.43 kilometrash në sekondë.

NASA parashikon që përplasja të ndodhë rreth orës 07:35, duke sqaruar se ngjarja nuk përbën asnjë rrezik për Tokën.

Bëhet fjalë për pjesën e sipërme të një rakete Falcon 9, e cila peshon mbi 4,000 kilogramë dhe ka përmasa të krahasueshme me një ndërtesë pesëkatëshe. Pas përmbushjes së misionit, ajo mbeti në hapësirë dhe vijoi lëvizjen e pakontrolluar.

Ekspertët thonë se momenti i goditjes nuk do të mund të shihet nga Toka me sy të lirë. Megjithatë, personat që kanë në dispozicion teleskopë të fuqishëm mund të arrijnë të dallojnë një shkëndijë të shkurtër mbi sipërfaqen hënore gjatë përplasjes.

Zëdhënësi i NASA-s, Jimi Russel, deklaroi se agjencia do të vazhdojë monitorimin e zonës së impaktit për qëllime shkencore, ndërsa nënvizoi se “nuk ka rrezik për Tokën”.

Nga kjo ngjarje, shkencëtarët e NASA-s synojnë të grumbullojnë të dhëna hënore dhe të përmirësojnë metodat e përdorura për gjurmimin e objekteve në hapësirë.

“Është diçka vërtet e madhe që po përplaset me Hënën. Nuk është aspak e rrezikshme, ne mund ta shikojmë shfaqjen“, tha Dr. Matt Bothwell, astronom publik në Universitetin e Kembrixhit.