LIVE/ Kuvendi vijon seancën, qytetarët protestojnë jashtë dhe nuk tërhiqen as pas dhunës së policisë

Vjedhjet e telefonave në rrugë po shënojnë rritje në qendrat kryesore turistike të Evropës dhe Amerikës së Veriut. Përballë këtij fenomeni, policia dhe kompanitë e mëdha të teknologjisë po punojnë që pajisjet e vjedhura të mos mund të përdoren nga rrjetet ndërkombëtare të vjedhjes.

Këto janë masat që duhet të merrni për të mbrojtur iPhone-in tuaj nëse e humbni gjatë kësaj vere.

Mundësia për t’i përdorur funksionet e sigurisë në momentin e nevojshëm varet nga disa përgatitje paraprake. Gjatë konfigurimit të parë, por edhe herë pas here më vonë, iOS u kërkon përdoruesve ta sigurojnë pajisjen, ndonëse jo të gjithë i kanë ndjekur këto udhëzime.

Fillimisht duhet të aktivizoni “Find My”, rrjetin e Apple që mundëson gjetjen e pajisjeve të lidhura me Apple ID-në tuaj. Hapni “Settings”, prekni emrin tuaj dhe më pas, brenda seksionit “Find My”, ndizni opsionin “Find My iPhone”. Pas këtij konfigurimi, pajisja mund të kërkohet nëpërmjet aplikacionit “Find My” ose faqes icloud.com/find.

Nëse telefoni humbet, fillimisht hyni në llogarinë tuaj Apple nga një pajisje tjetër, si një telefon inteligjent apo kompjuter, duke përdorur adresën icloud.com/find. Në këtë rast nuk kërkohet kod verifikimi, por duhet të dini fjalëkalimin e Apple ID-së.

Nga lista “All Devices” përzgjidhni pajisjen që kërkoni, aktivizoni komandën “Mark as Lost” dhe zbatoni hapat që paraqiten në ekran.

Nëse edhe pas kësaj pajisja nuk mund të gjendet, si zgjidhje përfundimtare mund të kryeni nga distanca fshirjen e të dhënave të saj.

Është thelbësore që pajisja të mos hiqet nga lista në funksionin “Find My”. Një veprim i tillë çaktivizon Activation Lock të iPhone-it dhe ua lehtëson hajdutëve ose personave që e kanë gjetur telefonin ta fshijnë dhe më pas ta shesin.

Vendndodhja e pajisjes shfaqet gjithashtu në faqen Find. Megjithatë, Apple këshillon që, kur bëhet fjalë për vjedhje apo grabitje, përdoruesi të mos shkojë vetë për ta marrë telefonin. Për të shmangur rrezikun, duhet njoftuar policia.

Siguria e një iPhone-i mund të forcohet edhe përmes disa masave të tjera kundër vjedhjes ose hyrjes së paautorizuar.

Ekrani duhet të mbrohet me një kod të fuqishëm, me të paktën 6 shifra ose, mundësisht, me një ndërthurje shkronjash dhe numrash. Duhet të aktivizohen gjithashtu Face ID ose Touch ID, ndërsa autentifikimi me dy faktorë duhet ndezur nëse nuk është vendosur më parë.

Përdoruesi duhet ta mbajë mend fjalëkalimin e Apple ID-së dhe të shënojë numrin IMEI të iPhone-it, duke e ruajtur atë në një vend të sigurt. Ky numër nevojitet, ndër të tjera, për paraqitjen e kallëzimit në polici në rast vjedhjeje.

Pasi të jenë zbatuar të gjitha masat mbrojtëse dhe të jetë depozituar kallëzimi në polici, mbetet edhe një veprim i fundit me rëndësi: aty ku është e mundur, duhet të mbyllen të gjitha seancat aktive të pajisjes në shërbimet bankare online, aplikacionet e komunikimit, llogaritë Google dhe platforma të tjera të ngjashme.

Nëse telefoni i humbur ishte pajisje e kompanisë, për ngjarjen duhet të vihet në dijeni edhe departamenti i IT-së i saj. Burimi: DPA News, https://dpa-international.com/trends-and-features/urn:newsml:dpa.com:20090101:260721-99-123453/