Google merr me qira kapacitetet e SpaceX, pagesa arrin në 920 milionë euro në muaj

Google ka lidhur një marrëveshje të rëndësishme me SpaceX për të marrë me qira kapacitetet kompjuterike të kompanisë që drejtohet nga Elon Musk. Në bazë të këtij pakti, Google do të paguajë afërsisht 920 milionë euro çdo muaj për 32 muaj, në atë që konsiderohet një nga kontratat më të mëdha në fushën e infrastrukturës së inteligjencës artificiale.

Kjo marrëveshje tregon se si ka ndryshuar pozicioni i dy kompanive krahasuar me pesë vite më parë, kur Google ishte ajo që i siguronte SpaceX burime kompjuterike për zhvillimin e Starlink, shërbimit satelitor të internetit. Ndryshimi mori përmasa të mëdha pas blerjes së kompanisë së inteligjencës artificiale xAI nga SpaceX në shkurt 2026, çka solli krijimin e një strukture të përbashkët që menaxhon qendra të mëdha të të dhënave me kapacitet informatik mbi 2 gigavat.

Marrëveshja është arritur vetëm pak ditë para ofertës fillestare publike të planifikuar të SpaceX. Kompania ka bërë të ditur edhe marrëveshje të ngjashme me Anthropic, ndërsa po synon hyrjen në bursë me një vlerësim që, sipas raportimeve, mund të shkojë përtej 1.75 trilion dollarëve. Sipas analistëve, partneriteti me Google mund të shtojë edhe më shumë interesin e investitorëve për IPO-n e kompanisë.

Në dokumentacionin paraprak të ofertës publike, SpaceX ka nënvizuar se infrastruktura e saj kompjuterike i ofron fleksibilitet të madh për ndarjen dhe monetizimin e kapaciteteve të lira, duke e vendosur kompaninë mes aktorëve kryesorë në tregun global të inteligjencës artificiale dhe të qendrave të të dhënave.