Dueli Argjentinë–Egjipt vendos rekord historik kërkimesh në Google

Përballja mes Argjentinës dhe Egjiptit në 1/8 e finales së Kupës së Botës ka lënë gjurmë jo vetëm në fushë, por edhe në internet, pasi ka shënuar nivelin më të lartë të kërkimeve të regjistruar ndonjëherë në Google.

Nick Fox, nënkryetar i lartë i kompanisë për njohuri dhe informacion, e konfirmoi këtë arritje, duke thënë se Google Search kishte “thyer të gjitha rekordet e mëparshme të përdorimit”.

Interesimi arriti pikën kulmore menjëherë pas golit vendimtar të Argjentinës, që u mundësoi kampionëve në fuqi të botës të përfundonin përmbysjen dhe ta mposhtnin Egjiptin me rezultat 3:2.

Sipas raportimeve, vala më e fuqishme e kërkimeve u shënua pasi Enzo Fernandez realizoi golin e fitores në çastet e fundit të takimit.

Pas këtij momenti, kërkimet u shtuan në mënyrë të jashtëzakonshme në të gjithë botën, veçanërisht për ndeshjen, Lionel Messin dhe Kupën e Botës.

Google, megjithatë, nuk ka bërë publike shifra të sakta mbi numrin e kërkimeve dhe nuk ka treguar as metodologjinë me të cilën është matur ky rekord.

Edhe pa të dhëna konkrete, pohimi i një prej drejtuesve të lartë të kompanisë dëshmon për interesimin e jashtëzakonshëm global që ngjalli sfida ndërmjet Argjentinës dhe Egjiptit.

Suksesi dramatik 3:2 i siguroi Argjentinës vazhdimin e garës në turne, ndërsa njëkohësisht e renditi këtë takim mes ngjarjeve sportive me jehonën më të madhe digjitale në historinë e Google. /GazetaExpress/