ChatGPT pritet të shndërrohet në një ndihmës për blerjet online

Një marrëveshje e re mes OpenAI dhe Visa do t’i japë së shpejti ChatGPT-së aftësinë për të realizuar blerje online në emër të përdoruesve. Përmes kësaj teknologjie, inteligjenca artificiale synon të kalojë nga roli i një platforme që sugjeron produkte në atë të një asistenti personal që menaxhon të gjithë procesin e blerjes.

Nëpërmjet funksionit të ri, përdoruesit do të jenë në gjendje t’i kërkojnë ChatGPT-së të identifikojë produkte sipas preferencave, nevojave dhe buxhetit të tyre.

Më pas, inteligjenca artificiale do të analizojë alternativat më të përshtatshme, do të bëjë krahasimin mes tyre dhe do ta finalizojë blerjen përmes kartës Visa të lidhur me llogarinë e përdoruesit. Për sigurinë e transaksioneve, përdoruesve do t’u ofrohet mundësia të caktojnë limite shpenzimesh, të kërkojnë miratim para çdo pagese dhe të përcaktojnë kategoritë e tregtarëve ku lejohen pagesat.

Procesi i pagesave do të monitorohet nga Visa, e cila do të përdorë sistemet e saj të mbikëqyrjes për të shmangur mashtrimet dhe abuzimet.

Sipas kompanive, ky partneritet përbën një zhvillim të rëndësishëm drejt asaj që përkufizohet si “tregtia agjentike”, një model ku inteligjenca artificiale nuk kufizohet vetëm te këshillimi i përdoruesve, por kryen edhe veprime konkrete në emrin e tyre.

Në fazën e parë, pjesa më e madhe e blerjeve do të kërkojë konfirmim nga përdoruesi para mbylljes së transaksionit. Në të ardhmen, për ata që zgjedhin ta aktivizojnë, sistemi mund të ofrojë shkallë më të lartë automatizimi.