ChatGPT ju lejon të provoni virtualisht veshjet përpara se t’i blini

ChatGPT ka shtuar mjete të reja për blerjet online, duke u ofruar përdoruesve mundësinë të testojnë virtualisht veshje dhe aksesorë, si dhe të ruajnë produktet që u interesojnë për t’i parë përsëri më vonë.

Këto zhvillime vijnë në një periudhë kur platformat e inteligjencës artificiale po përfshihen gjithnjë e më shumë në procesin e kërkimit, përzgjedhjes dhe blerjes së produkteve në internet.

Funksioni i parë quhet “Try On” dhe mundëson ngarkimin e një selfie-je ose të një fotografie të plotë të trupit, mbi të cilën përdoruesi mund të shohë se si do të dukej një veshje apo aksesor i caktuar.

Opsioni do të jetë i disponueshëm përmes një butoni të veçantë “Try On”, i cili shfaqet në rezultatet e shopping-ut.

Gjithashtu, përdoruesit mund të ngarkojnë imazhin e një produkti, përfshirë një screenshot të marrë nga një faqe interneti, dhe t’i kërkojnë ChatGPT-së ta aplikojë atë virtualisht mbi fotografinë e tyre.

OpenAI thotë se ky proces përdor teknologjinë e re të gjenerimit të imazheve, e krijuar për të sjellë ndriçim më natyral, tekstura më bindëse dhe modifikime fotografike më të sakta.

Funksioni i dytë mban emrin “Favorites” dhe shërben për ruajtjen e produkteve të preferuara në një bibliotekë brenda aplikacionit.

Përveç artikujve të gjetur gjatë kërkimit, në këtë hapësirë mund të ruhen edhe imazhet e krijuara gjatë provave virtuale.

Kështu, përdoruesit mund t’i krahasojnë më lehtë alternativat ose të mbajnë një listë me veshje dhe aksesorë që planifikojnë t’i blejnë në një moment të mëvonshëm.

ChatGPT mund të përdoret edhe për të ndërtuar një kombinim të plotë mode. Përdoruesi mund të përshkruajë stilin që dëshiron dhe t’i kërkojë sistemit të propozojë veshjet dhe aksesorët e nevojshëm.

Një tjetër mundësi është ngarkimi i fotografive të personazheve të famshëm, me qëllim gjetjen e produkteve të ngjashme me ato që ata kanë veshur.

Me këto funksione, ChatGPT po hyn në një hapësirë ku prej vitesh Pinterest dhe Google kanë shërbyer si mjete për zbulimin e trendeve dhe marrjen e ideve për modën.

Kompanitë teknologjike po testojnë mënyra të ndryshme për ta bërë inteligjencën artificiale pjesë të përvojës së blerjeve, por kjo fushë përballet edhe me vështirësi.

Rekomandimet e shumta mund të duken më tepër si reklama sesa si ndihmë, ndërsa shërbimet që synojnë blerjet e drejtpërdrejta nuk kanë funksionuar gjithmonë sipas pritshmërive.

Për momentin, prova virtuale synon të adresojë një nevojë konkrete: t’u krijojë blerësve një ide më të qartë për pamjen e një produkti përpara se të vendosin ta blejnë.

Mbetet për t’u parë nëse ChatGPT do të shndërrohet në një nga mjetet kryesore për shopping online, veçanërisht pasi edhe kompani të tjera të mëdha teknologjike ofrojnë tashmë shërbime të ngjashme të provës virtuale. /GazetaExpress/