Zbulohet MG 07: Sedani i ri elektrik me dizajn fastback

Marka britanike MG, tashmë nën pronësinë kineze, ka prezantuar sedani i ri MG 07, një automjet elektrik me linja sportive të tipit fastback, i cili hyn në garën e tregut të automjeteve elektrike që po rritet me shpejtësi.

Makina e re shquhet për një estetikë bashkëkohore, profil të ulët dhe dinamik, si dhe teknologji të fundit, ku spikat sensori LiDAR i instaluar mbi çati. Ky sistem i sofistikuar hap rrugën për funksione të asistuara të drejtimit dhe aftësi gjysmë autonome të lëvizjes.

MG 07 do të vijë në disa konfiguracione, përfshirë një model tërësisht elektrik dhe një tjetër hibrid plug-in. Sipas burimeve, varianti elektrik do të pajiset me një motor prej rreth 239 kuajfuqish, një bateri 67 kWh dhe një rreze veprimi që arrin deri në afërsisht 650 kilometra bazuar në protokollet kineze të vlerësimit.

Alternativa hibrid plug-in bashkon një motor termik 1.5 litra me një njësi elektrike, duke ofruar një distancë afro 185 kilometrash në modalitetin plotësisht elektrik, sipas shifrave të shpërndara për publikun kinez.

Me anë të këtij automjeti, MG kërkon të forcojë pozitat e saj në kategorinë e sedanëve elektrikë, ku do të sfidojë rivalë të afirmuar si Tesla Model 3, BYD Seal dhe Xiaomi SU7.

Në tregun vendas të Kinës, çmimi hyrës i MG 07 mendohet të nisë nga rreth 150 mijë juanë, ndërsa për versionet me pajisje më të pasura vlera mund të shkojë deri te përafërsisht 200 mijë juanë.

Ky model pritet të jetë një shtyllë kryesore në strategjinë elektrike të MG-së, megjithëse kompania nuk ka dhënë ende konfirmime zyrtare lidhur me planet për ta sjellë atë në tregjet evropiane.