Volkswagen debuton në segmentin e hibrideve të plota me Golf dhe T-Roc

Prodhuesi gjerman ka zbuluar sistemin e tij të parë full-hybrid, i cili do të pajisë modelet Golf dhe T-Roc, duke shënuar një hyrje më të thellë në kategorinë e automjeteve plotësisht hibride.

Kjo teknologji e re integron lëvizjen elektrike me efikasitet të lartë dhe autonomi të gjatë, duke eliminuar plotësisht nevojën për karikim të jashtëm. Sistemi përbëhet nga dy motorë elektrikë dhe një motor benzine me turbo, i cili premton konsum dukshëm më të ulët karburanti krahasuar me zgjidhjet mild-hybrid.

Energjia për funksionimin elektrik prodhohet gjatë udhëtimit nëpërmjet rigjenerimit dhe motorit me benzinë, i cili bashkëpunon me një gjenerator. Sipas njoftimeve të kompanisë, konfigurimi fillestar i sistemit do të ketë një fuqi prej 125 kilovatësh, shifër kjo e barabartë me 170 kuaj-fuqi.

Në përdorimin e përditshëm, automjetet mund të qarkullojnë për periudha të shkurtra vetëm me energji elektrike, ndërsa bateria rimbushet vazhdimisht gjatë lëvizjes pa pasur nevojë për prizë. Kjo veçori ofron një alternativë për shoferët që dëshirojnë përfitimet e elektrizimit pa u kufizuar nga pikat e karikimit.

Sistemi i ri është projektuar për të reduktuar ndjeshëm konsumin e karburantit dhe emetimet e CO₂, duke ruajtur komoditetin dhe performancën e modeleve tradicionale. Golf Hybrid dhe T-Roc Hybrid pritet të mbërrijnë në treg në fund të këtij viti.

Me këtë hap, Volkswagen zgjeron portofolin e automjeteve të elektrifikuara dhe forcon pozicionimin e tij në segmentin e hibrideve të plota, krahas ofertave ekzistuese elektrike dhe atyre plug-in hibride.