“Vëllim, vëllim, vëllim”, kreu i Nissan pranon qasjen që i kushtoi shtrenjtë kompanisë

Më shumë se një vit pas marrjes së detyrës, CEO i Nissan, Ivan Espinosa, ka ndërmarrë një seri ndryshimesh të thella te prodhuesi japonez i automjeteve.

Në qendër të këtij transformimi është plani i rimëkëmbjes Re:Nissan, i cili synon që modelet e reja të dalin në treg dukshëm më shpejt se më parë.

Në përputhje me strategjinë e re, periudha e zhvillimit për modelet e gjeneratës së ardhshme do të shkurtohet nga 52 në 37 muaj.

Një nga shtyllat kryesore të kësaj përpjekjeje për rikuperim mbetet rifreskimi i gamës së produkteve, përmes prezantimit të shumë modeleve të reja si për markën Nissan, ashtu edhe për divizionin luksoz Infiniti.

Paralelisht, kompania ka vënë në zbatim një program të gjerë të uljes së shpenzimeve, i cili përfshin heqjen e rreth 20,000 vendeve të punës, si edhe mbylljen e shtatë fabrikave dhe dy studiove të dizajnit.

Nissan po redukton ndjeshëm edhe kapacitetin e prodhimit në vit, nga 3.5 milionë në 2.5 milionë njësi, ndërsa numri i platformave do të bjerë nga 13 në vetëm 7.

Teksa këto masa synojnë të krijojnë bazat për një të ardhme më të qëndrueshme, Espinosa është kthyer edhe te problemet e së kaluarës nën drejtimin e mëparshëm.

“Më parë, ishte si, në rregull, ne duam, vëllim, vëllim, vëllim. Kjo nuk është një mënyrë e mirë për të drejtuar një kompani veturash”, deklaroi ai.