Urban E Fragment Edition, motoçikleta elektrike luksoze e Brabus-it prodhohet vetëm në 10 ekzemplarë

Brabus ka zbuluar Urban E Fragment Edition, një motoçikletë elektrike të krijuar së bashku me DAB Motors dhe stilistin japonez Hiroshi Fujiwara, përmes markës së tij të modës Fragment Design. Prodhimi do të kufizohet në vetëm 10 njësi në të gjithë botën, ndërsa në tregun e Amerikës së Veriut modeli kushton 50 mijë dollarë.

Premiera e motoçikletës u zhvillua në ComplexCon 2026, në Los Angeles, ku u ndërthurën moda urbane dhe kultura e motoçikletave. Urban E Fragment Edition largohet nga kombinimi i zakonshëm i fibrës së karbonit dhe kromit që Brabus përdor në projektet e saj, duke adoptuar një paraqitje minimaliste bardhezi, të ndikuar nga stili i Fujiwarës, një prej emrave më të rëndësishëm të modës urbane japoneze.

Baza teknike është zhvilluar nga DAB Motors, ndërsa montimi i motoçikletës bëhet me dorë në Francë. Modeli special përdor të njëjtën platformë si Urban E standard, transmeton Telegrafi.

Në Amerikën e Veriut, çmimi prej 50 mijë dollarësh është dukshëm më i lartë se ai i një Urban E me pajisje të ngjashme në Evropë. Brabus e ofron edicionin e kufizuar për 45 mijë euro pa taksa, duke e vendosur atë në kategorinë e motoçikletave luksoze. Çmimi ndikohet ndjeshëm nga bashkëpunimi me Fujiwarën dhe numri shumë i kufizuar i njësive të prodhuara.

Urban E Fragment Edition fuqizohet nga një motor elektrik 27 kilovatësh, ekuivalent me rreth 37 kuajfuqi. Çift rrotulluesi prej 350 lb-ft dërgohet në rrotën e pasme përmes një rripi karboni, i cili kërkon më pak mirëmbajtje se zinxhiri tradicional.

Sipas të dhënave të prodhuesit, motoçikleta mund të arrijë shpejtësinë maksimale prej rreth 121 km/h. Bateria litium-jon 72 volt siguron deri në 150 kilometra autonomi gjatë përdorimit urban.

Drejtuesi mund të zgjedhë mes tri programeve: Eco, Street dhe Sport. Në funksionin Eco, shpejtësia kufizohet në rreth 60 km/h dhe fuqia e çift rrotulluesit ulet, duke e bërë më të përshtatshëm përdorimin në qytet.

Me një prizë të zakonshme shtëpiake, bateria karikohet nga 20 në 100 për qind për rreth tri orë. Një karikim i plotë, duke nisur nga zero, kërkon afërsisht 3.5 deri në katër orë.

Pajisjet e frenimit janë furnizuar nga Brembo dhe përfshijnë një kaliper të përparmë me katër pistona, të lidhur me një disk 12.6 inç, si dhe ABS me dy kanale. Në pjesën e përparme është instaluar një pirun i përmbysur me diametër 46 milimetra, ndërsa pas tij ndodhet një amortizator i personalizuar. Të dyja pjesët ofrojnë rreth 9.9 centimetra udhëtim.

Blerësit evropianë mund ta porosisin Urban E Fragment Edition përmes rrjeteve të Brabus-it dhe DAB Motors. Me vetëm 10 ekzemplarë në plan, modeli u drejtohet kryesisht koleksionistëve dhe pasionantëve të mjeteve ekskluzive, duke u pozicionuar shumë më lart se motoçikletat elektrike të destinuara për përdorim të zakonshëm të përditshëm. /Telegrafi/