Ukraina teston StarGate, dronin që mund të evakuojë të plagosurit brenda pak minutash

Një kompani nga Ukraina ka prezantuar një mjet të pazakontë për shpëtimin e të plagosurve në fushëbetejë: një dron me kabinë të mbyllur, i projektuar për të transportuar ushtarë.

Fluturakja StarGate, e zhvilluar nga SkyFall, u filmua duke u ngritur, fluturuar dhe zbritur me një person brenda. Pamjet u raportuan nga mediat e huaja, përcjell Telegrafi.

Droni drejtohet nga distanca dhe është menduar të arrijë te të plagosurit në vende ku automjetet tokësore nuk mund të kalojnë. Sipas të dhënave të publikuara, ai mund të mbajë deri në 150 kg dhe të fluturojë me shpejtësi deri në 105 km/orë.

Kapaciteti për të kapërcyer fusha të minuara, lumenj dhe rrugë të dëmtuara mund të zvogëlojë rrezikun dhe kohën e nevojshme për evakuime pranë vijës së frontit.

Në regjistrim, një përfaqësues i SkyFall del nga kabina pasi mjeti ulet, ndërsa operatori që e kontrollon ndodhet larg.

Kompania pretendon se StarGate mund ta ulë kohën e evakuimit nga disa orë ose ditë në vetëm pak minuta, duke u mundësuar ushtarëve të plagosur të marrin më shpejt ndihmë mjekësore.

Sistemi mbështetet te Starlink dhe L-Link, teknologjia e SkyFall. Ai përfshin gjithashtu funksione të asistuara nga inteligjenca artificiale, të cilat janë krijuar për të ruajtur funksionimin edhe kur ka ndërhyrje në navigimin satelitor.

Gjatë demonstrimit, droni u paraqit edhe duke hedhur një rrjetë për të kapur një mjet ajror pa pilot armik.

Prototipi i është dorëzuar një brigade luftarake ukrainase, e cila do ta provojë në kushte të vijës së frontit.

SkyFall nuk ka bërë ende publike rezultatet e testeve, ndërsa aftësia e StarGate për të kryer evakuime në luftime reale nuk është verifikuar në mënyrë të pavarur.