Tesla Model Y L përballet me ankesa për defekte në pezullim

Vetëm një vit pas prezantimit, versioni i zgjatur Tesla Model Y L është vënë përballë një numri të madh ankesash nga pronarët, raporton Carnewschina.

Modeli me gjashtë ulëse prodhohet në Shangai dhe u prezantua në gusht të vitit të kaluar. Pritet që ai të mbërrijë së shpejti edhe në tregun evropian.

Shqetësimet janë bërë të dukshme në rrjetet sociale kineze, ku përdoruesit pretendojnë se pezullimi i pasmë ulet ndjeshëm kur automjeti mbushet me pasagjerë ose ngarkohet.

Rënia e pjesës së pasme është aq e theksuar sa rrotat pothuajse prekin karrocerinë. Si pasojë, automjeti mund të ketë vështirësi në mbajtjen e rrugës, ndërsa pjesa e poshtme mund të prekë tokën dhe gomat mund të dëmtohen.

Hapësira ndërmjet gomës dhe harkut të rrotës ngushtohet veçanërisht gjatë udhëtimeve të gjata ose kur makina është plotësisht e ngarkuar. Në situatat më të rënda, ajo bëhet aq e vogël sa pronarët nuk arrijnë të fusin as një gisht mes gomës dhe skajit të parafangos.

Pezullimi i ulur ndikon edhe në këndet e rrotave. Kjo sjell konsumim ekstrem të pjesës së brendshme të gomave të pasme, ndërsa disa pronarë thonë se gomat e reja kanë arritur kufirin ligjor të konsumimit brenda një periudhe shumë të shkurtër.

Tesla po zëvendëson falas sustat e dëmtuara, përmes garancisë. Megjithatë, serviset nuk po mbulojnë ndërrimin e gomave të konsumuara, ndaj pronarët duhet të përballojnë vetë shpenzimet për to.

Sipas pronarëve të prekur, ndërhyrja në susta nuk përbën një zgjidhje afatgjatë. Njëri prej tyre ka deklaruar se pezullimi i ri u dëmtua sërish vetëm dhjetë ditë pas vizitës në servis, duke bërë që automjeti të anohej ndjeshëm gjatë drejtimit.

Pas kërkesës për një riparim tjetër, servisi e ka informuar klientin se për momentin nuk ekziston një zgjidhje e përhershme për këtë defekt.

Deri tani, Tesla nuk ka dhënë një qëndrim zyrtar dhe nuk ka njoftuar tërheqjen nga tregu të automjeteve të prekura nga problemet e pezullimit.