Si të dalloni se bateria e makinës po dobësohet

Akumulatori i makinës është një nga arsyet më të zakonshme pse drejtuesit i drejtohen mekanikëve. Me kalimin e kohës, ciklet e shpeshta të karikimit dhe shkarkimit, bashkë me vjetërsinë e automjetit dhe të vetë akumulatorit, mund të çojnë në shfaqjen e problemeve.

Për të bërë një verifikim të thjeshtë nuk nevojiten pajisje të posaçme. Mjafton ta parkoni makinën në një vend të errët përballë një muri, ta fikni motorin dhe të ndizni dritat e shkurtra. Në rast se pas pak çastesh ndriçimi nis të zbehet, kjo mund të tregojë se akumulatori po e humb fuqinë dhe se mund t’i jetë afruar fundit të përdorimit.

Edhe pse një matje më e saktë realizohet me voltmetër, kjo nuk është një pajisje që gjendet në çdo familje. Pikërisht për këtë, prova me dritat mbetet një zgjidhje e shpejtë dhe praktike që shoferët mund ta përdorin vetë për të vërejtur sinjale të mundshme problemi.

Tregues të tjerë të një akumulatori të dobësuar janë vështirësia në ndezjen e motorit, rrotullimi i ngadaltë i starterit, zbehja e dritave, si edhe problemet e herëpashershme me sistemet elektrike të makinës.

Ekspertët u sugjerojnë shoferëve që pas parkimit të kontrollojnë nëse dritat janë fikur dhe nëse dyert janë mbyllur si duhet. Edhe lënia ndezur e një drite të brendshme mund të shkarkojë akumulatorin.

Një kontroll i vogël para nisjes mund t’ju kursejë situata të pakëndshme, veçanërisht në ato momente kur makina refuzon të ndizet pikërisht atëherë kur ju nevojitet më shumë.