Porsche synon ta ruajë kambion manuale edhe në të ardhmen

Porsche do të vijojë të prodhojë automjete me transmision manual për aq kohë sa këtë e mundësojnë rregulloret dhe interesi i klientëve.

Nga viti 2027, opsioni i kambios manuale me gjashtë shpejtësi do të rikthehet te Porsche 911 Carrera S, pas kërkesës së lartë për variantet manuale të 911 GT3.

CEO i Porsche Cars North America, Timo Resch, deklaroi se synimi i kompanisë është ta ofrojë transmisionin manual edhe përgjatë dekadës së ardhshme, nëse ai vazhdon të kërkohet nga blerësit.

Pengesa më e madhe në këtë drejtim është elektrifikimi.

Aktualisht, sistemi hibrid që përdoret në modelet 911 GTS dhe Turbo S nuk funksionon me kambion manuale. Megjithatë, Porsche lë të hapur mundësinë që inxhinierët e saj të zhvillojnë një zgjidhje në të ardhmen.

Në një kohë kur pjesa më e madhe e prodhuesve po heq dorë nga transmisionet manuale, Porsche synon t’i ruajë ato për sa kohë që legjislacioni dhe tregu e bëjnë të mundur.