Porsche SE kërkon reagim të menjëhershëm nga Volkswagen përballë presionit kinez

Volkswagen po përballet me kërkesa për ndërhyrje të shpejta, pasi aksionari i saj më i madh, Porsche SE, ka paralajmëruar për nevojën e masave urgjente ndaj konkurrencës në rritje nga prodhuesit kinezë të makinave.

Porsche SE zotëron rreth 31.9% të aksioneve të Volkswagen dhe, përmes saj, Porsche dhe familjet Piëch ushtrojnë kontroll mbi kompaninë gjermane.

Sipas Hans Dieter Pötsch, kryetar i Porsche SE, Volkswagen ndodhet në një “pikë kthese historike”. Ai theksoi se zgjedhjet që do të bëhen në këtë moment do të kenë ndikim vendimtar në të ardhmen e prodhuesit të automjeteve.

Pötsch bëri thirrje që vendimmarrja të përshpejtohet, duke paralajmëruar se çdo vonesë mund ta rëndojë më tej situatën e kompanisë.

Plani i propozuar përfshin reduktimin e kapaciteteve të tepërta, procese më të shpejta për marrjen e vendimeve dhe një ulje të konsiderueshme të shpenzimeve.

Në kuadër të përpjekjeve për të rritur fitimet dhe produktivitetin, Volkswagen po shqyrton gjithashtu shkurtimin e deri në 100 mijë vendeve të punës.

Presioni ndaj kompanisë është shtuar ndërsa prodhuesit kinezë, veçanërisht në tregun e automjeteve elektrike, po zgjerojnë me ritme të shpejta praninë e tyre.

BYD, Geely dhe SAIC po konkurrojnë me Volkswagen jo vetëm në Kinë, por edhe në Evropë, Amerikën Latine dhe Afrikë.

Porsche SE vlerëson se konkurrueshmëria duhet të jetë boshti i strategjisë së Volkswagen. Për këtë arsye, kompania duhet të analizojë çdo alternativë që mund të ndihmojë në uljen e kostove dhe në përmirësimin e efikasitetit të fabrikave.

Zbatimi i këtyre ndryshimeve do ta përballte Volkswagen me një prej proceseve më të mëdha të ristrukturimit në historinë e saj 89-vjeçare.