Peralta D, Maserati i veçantë me karroceri bakri të punuar me dorë

GFG Style, studioja italiane e dizajnit e themeluar nga Giorgetto Giugiaro dhe djali i tij Fabrizio, ka zbuluar një Maserati unik të ndërtuar mbi bazën e modelit GranTurismo, i cili dallohet për karrocerinë e realizuar me dorë nga bakri.

I pagëzuar me emrin Peralta D, automjeti është porositur nga biznesmeni meksikan Carlos Peralta dhe u prezantua më 24 tetor, gjatë ngjarjes Pastejé Automotive Invitational 2026.

Karakteri i pazakontë i makinës vërehet te panelet e mëdha prej bakri, format e theksuara dhe zgjidhjet unike të aplikuara në dizajn.

Katër dyert që ngrihen lart si krahë pulëbardhe përbëjnë një nga elementet më dalluese të modelit. Për hyrje më të lehtë në kabinë shërben edhe pjesa e përparme e çatisë, e cila mund të ngrihet.

Kabina është punuar sipas kërkesave të veçanta të pronarit dhe ndërthur lëkurën kafe me elemente në nuanca bakri e ari, krahas teknologjisë digjitale. Në hapësirën mes sediljeve të pasme është integruar edhe një mbajtëse shampanje.

Modeli është ndërtuar mbi një strukturë me fibra karboni dhe shasi alumini. Të dhënat e plota teknike ende nuk janë publikuar, por prania e katër gypave të shkarkimit tregon se Peralta D përdor një motor me benzinë.

Ky automjet është pjesë e serisë së makinave të personalizuara të porositura nga Carlos Peralta. Paraardhësi i tij, Peralta S, bazohej në Maserati MC20 dhe ishte dedikuar djemve të biznesmenit, ndërsa modeli i fundit është krijuar për vajzat e tij.

Vlera financiare e këtij ekzemplari të vetëm nuk është bërë e ditur.