Opel zgjeron gamën sportive me Astra GSE Line

Opel po i jep një rol të ri emërtimit sportiv GSE, duke e nisur këtë ndryshim me modelin Astra. Shenja, e përdorur deri më tani vetëm për modelet më të fuqishme, nga pranvera e vitit 2027 do të ofrohet edhe në formën GSE Line, si një paketë me pamje sportive që nuk varet nga lloji i motorit.

Premiera e Astra GSE Line do të zhvillohet në panairin e automjeteve në Paris. Kjo paketë do të zërë gradualisht vendin e nivelit aktual të pajisjeve GS. Në dallim nga Mokka GSE dhe Corsa GSE, që janë modele plotësisht elektrike me performancë më të lartë, GSE Line përqendrohet kryesisht te pajisjet dhe elementet e dizajnit.

Paketa GSE Line për Astrën do të jetë e disponueshme me disa alternativa motorizimi. Ajo do të mund të porositet me variante plotësisht elektrike, hibride plug-in, hibride të lehta dhe motorë tradicionalë me djegie të brendshme.

Nga jashtë, Astra GSE Line do të identifikohet përmes një sërë detajesh sportive, mes tyre elementet e vendosura poshtë maskës karakteristike Vizor dhe një emblemë e posaçme në parakolp. Fellnet prej alumini Diamond Cut me përmasa 17 inç do të jenë pjesë e pajisjeve standarde, kurse ato 18-inç do të ofrohen kundrejt një pagese shtesë.

Kabina do të marrë qepje të verdha kontrastuese në ulëse, timon, veshjet e dyerve dhe mbështetësen qendrore të krahut. Pajisjet do të plotësohen nga pedalet sportive prej alumini. Në disa variante motorizimi do të jenë të disponueshme edhe ulëse sportive, me mbështetëse koke të integruara dhe përkrahje anësore më të theksuar.

Prodhuesi ka njoftuar gjithashtu se gjatë vitit 2027 pritet të prezantojë një Astra më të fuqishme, me 280 kuaj fuqi. Pas debutimit te Astra, Opel planifikon ta shtrijë paketën GSE Line edhe te modelet e tjera. Informacionet e plota, së bashku me hollësitë për nisjen e shitjeve, do të publikohen gjatë panairit të automjeteve në Paris.