Modelet klasike mbi 50 vjet të vjetra mund të jenë më kursimtare se veturat moderne

Një pjesë e veturave të prodhuara më shumë se 50 vjet më parë rezulton të ketë konsum më të ulët karburanti sesa disa modele bashkëkohore.

Këtë e dëshmojnë të dhënat e një prove të realizuar nga revista gjermane Auto Bild, ku u analizua konsumi i 110 veturave klasike.

Sipas matjeve, 12 prej automjeteve të përfshira në test shpenzonin më pak se gjashtë litra karburant për 100 kilometra. Rezultatin më të mirë e arriti Volkswagen Golf i gjeneratës së parë, i pajisur me motor dizel prej 54 kuajfuqish.

Me një peshë prej vetëm 851 kilogramësh, ky Golf konsumoi 3.9 litra naftë për 100 kilometra. Në të njëjtën distancë, Volkswagen Golf 8 me motor 2.0 TDI harxhoi 4.3 litra.

Në test u përfshinë edhe automjete me motorë me benzinë. Fiat 500 klasik ishte modeli më ekonomik i këtij grupi, me shpenzim prej 4.8 litrash për 100 kilometra, ndërsa Fiat 500 Hybrid i kohëve të fundit konsumoi 5.2 litra.

Rezultate të favorshme regjistruan gjithashtu Trabant dhe Citroën AX, të dyja me konsum prej 5.3 litrash për 100 kilometra.

Megjithatë, këto shifra duhet të vlerësohen duke marrë parasysh ndryshimet mes makinave të vjetra dhe atyre të reja. Automjetet klasike zakonisht janë më të lehta dhe kanë më pak pajisje, ndërsa modelet moderne përfshijnë sisteme të avancuara sigurie, teknologji bashkëkohore dhe motorë që duhet të respektojnë rregulla më të ashpra për emetimet.

Volkswagen Golf i gjeneratës së parë, për shembull, prodhonte më shumë tym dhe motori i tij shkaktonte dridhje të konsiderueshme gjatë funksionimit, mangësi që nuk do të pranoheshin nga standardet e sotme.

Testimi nënvizon se pesha dhe mënyra e ndërtimit të një veture kanë ndikim të rëndësishëm në konsumin e karburantit. Sidoqoftë, një shpenzim më i ulët nuk do të thotë automatikisht se një model i vjetër është zgjedhje më e mirë se një veturë moderne, sidomos kur vlerësohen siguria dhe ndotja e shkaktuar nga emetimet.