Mazda nuk heq dorë nga motorët me benzinë: ja arsyeja e strategjisë së saj

Mazda po vijon të investojë në motorët klasikë me djegie të brendshme, pavarësisht se vitet e fundit ka zgjeruar ofertën me disa modele hibride. Prodhuesi japonez beson se këto njësi mbeten të rëndësishme, veçanërisht në tregjet e mëdha.

Moritz Oswald, përgjegjës për planifikimin e produkteve të Mazda-s në Evropë, tha se kompania synon t’u ofrojë klientëve alternativën më të përshtatshme sipas nevojave të tyre.

“Një pjesë e strategjisë sonë është të ofrojmë motorin e duhur për klientin e duhur”, deklaroi Oswald në një intervistë për revistën Car Magazine.

Ai shtoi se kalimi nga motorët me djegie të brendshme nuk do të ndodhë menjëherë. “Ne nuk do ta heqim motorin me djegie të brendshme brenda natës”, theksoi Oswald, duke nënvizuar se Mazda nuk do të përqendrohet vetëm te automjetet elektrike.

Një nga zhvillimet kryesore të ardhshme të markës është motori me benzinë Skyactiv-Z. Bëhet fjalë për një motor me katër cilindra dhe vëllim 2.5 litra, i cili po projektohet për të përmbushur standardet e ardhshme evropiane të emetimeve Euro 7.

Skyactiv-Z do të përdorë një proces djegieje me përzierje shumë të varfër. Përmes kësaj zgjidhjeje, Mazda synon të përfitojë më shumë nga nxehtësia e prodhuar gjatë djegies dhe të reduktojë konsumin e karburantit, pa ndikuar në performancë.

Motori i ri do të lidhet me sistemin hibrid të zhvilluar nga Mazda dhe pritet të vendoset në gjeneratën e ardhshme të Mazda CX-5, e cila planifikohet të prezantohet deri në fund të vitit 2027.

Sipas kompanisë, Skyactiv-Z do të ketë rol të rëndësishëm në gamën e automjeteve gjatë periudhës së elektrifikimit. Teknologjitë e tij pritet të shërbejnë më vonë edhe për motorët më të mëdhenj me gjashtë cilindra në linjë, si dhe për zhvillimin e motorëve rrotullues të Mazda-s.

Strategjia e prodhuesit japonez parashikon përdorimin paralel të motorëve me djegie të brendshme dhe teknologjive elektrike, në vend të një orientimi ekskluziv drejt automjeteve elektrike.