Lamborghini: Supermakinat e së ardhmes duhet të ofrojnë më shumë se shpejtësi

Për një kohë të gjatë, receta e një supermakine dukej e pandryshueshme: performancë e jashtëzakonshme, pamje tërheqëse, motor i veçantë dhe një çmim shumë i lartë. Lamborghini mendon se sot kjo qasje nuk është më e mjaftueshme.

Prodhuesi italian vëren se përparimi i teknologjisë elektrike ka bërë që edhe limuzinat dhe SUV-të elektrikë të arrijnë përshpejtimin nga 0 në 100 km/h për afërsisht tre sekonda. Për këtë arsye, shpejtësia e pastër nuk ka më të njëjtën peshë si dikur në përcaktimin e një supermakine.

Paolo Racchetti, përgjegjës për linjën e modelit Temerario, deklaroi për CarExpert në Milano se performanca vazhdon të jetë një element kyç, por një automjet i këtij lloji nuk mund të vlerësohet vetëm përmes shifrave të përshpejtimit.

“Shpejtësia është ende një pjesë e rëndësishme e performancës, por është e qartë se ajo është e domosdoshme, por jo e mjaftueshme, që një makinë të quhet supermakinë”, u shpreh Racchetti.

Sipas tij, rëndësi më të madhe do të fitojnë sjellja e automjetit në rrugë, aftësitë dinamike dhe, mbi të gjitha, emocioni që përjeton personi në timon.

“Një supermakinë nuk duhet të ofrojë vetëm përshpejtim dhe shpejtësi, por edhe emocion”, theksoi ai, transmeton Telegrafi.

Kjo filozofi e Lamborghini-t shfaqet në një periudhë kur elektrifikimi po e bën gjithnjë e më të zakonshme performancën ekstreme. Automjetet elektrike tashmë arrijnë rezultate që dikur ishin karakteristikë vetëm e supermakinave më të kushtueshme.

Lamborghini, marka që në vitet ’60 kontribuoi në formësimin e segmentit të supermakinave përmes ikonës Miura, nuk duket se dëshiron që modelet e saj të njihen thjesht si automjete me shpejtësi të lartë.

Kjo qasje lidhet edhe me mënyrën se si kompania po e trajton elektrifikimin. CEO-ja Stephan Winkelmann ka bërë të ditur më herët se modeli i parë plotësisht elektrik i Lamborghini-t është shtyrë pa një afat të përcaktuar, ndërsa puna për zhvillimin e tij vijon.

Në vend të një supermakine tërësisht elektrike, modeli i katërt i gamës së kompanisë, një GT 2+2 i bazuar në frymëzimin e konceptit Lanzador, pritet të pajiset me një sistem hibrid plug-in.

Megjithatë, kjo nuk nënkupton se Lamborghini po e braktis elektrifikimin. Revuelto, Temerario dhe Urus SE tashmë janë të pajisura me teknologji elektrike në forma të ndryshme.

Synimi i kompanisë është që elektrifikimi të mos i shndërrojë modelet e saj në automjete që vlerësohen vetëm për kohën e nevojshme për të kaluar nga 0 në 100 km/h.

Ndërkohë, rikthimi i transmisionit manual nuk është pjesë e planeve të afërta të markës. Racchetti pranoi se do të ketë gjithmonë blerës që e kërkojnë kambion manuale për shkak të lidhjes së saj me historinë dhe traditën e Lamborghini-t.

Megjithatë, ai theksoi se kompania duhet të vijojë përpara, duke iu përshtatur zhvillimeve të së ardhmes.

Për Lamborghini-n, sfida e ardhshme nuk konsiston vetëm në krijimin e një automjeti më të shpejtë se modeli paraardhës. Marka duhet të ruajë edhe ndjesinë e veçantë që e ka shndërruar në një nga emrat më të njohur të industrisë së supermakinave.

Ndërsa shpejtësia ekstreme po bëhet më e zakonshme në treg, Lamborghini synon të veçohet për një element që nuk mund të përmblidhet në të dhënat e kronometrit: emocionin që përjetohet pas timonit. /Telegrafi/