Ja çfarë ndodh me sistemin e frenimit kur makina qëndron gjatë në parkim

Qëndrimi i zgjatur në parkim sjell transformime në mekanizmin e frenave që rrezikojnë sigurinë në momentin e lëvizjes së parë.

Përbërja kryesore e disqeve dhe tamburëve është një aliazh çeliku, i cili disponon një mbrojtje minimale kundër ndryshkjes.

Mjaftojnë vetëm pak orë ekspozim në një mjedis me lagështi që në pjesët metalike të formohet një cipë e hollë oksidimi. Me kalimin e kohës, dëmtimi thellohet, sidomos në parkingje me drenazhim të mangët apo gjatë stinës së ftohtë, kur kripa rrugore bie në kontakt me komponentët e frenimit.

Dëmtimi nga korrozioni komprometon aftësinë frenuese, ndaj drejtuesve të mjeteve u rekomandohet vigjilencë e shtuar në lëvizjen e parë pas një pauze disaditore, javore ose edhe më të gjatë. Përpara se të dilni në rrugë, ushtroni disa herë presion të lehtë mbi pedalin e frenës dhe lëshojeni gradualisht. Sapo të viheni në lëvizje, zgjidhni një hapësirë pa trafik dhe frenoni me butësi për të pastruar shtresën sipërfaqësore të ndryshkut dhe për të verifikuar reagimin e sistemit.

Një tregues tjetër që nuk duhet injoruar janë tingujt e çuditshëm që shoqërojnë frenimin. Nëse fishkëllimat apo zhurmat e pazakonta nuk zhduken edhe pas disa përdorimeve, është e domosdoshme një inspektim profesional pranë një mekaniku të kualifikuar.

Specialistët sugjerojnë që, përpara një periudhe të gjatë imobilizimi, të kryeni një xhiro në rrugë të thata dhe të frenoni lehtë, me qëllim pastrimin e papastërtive të grumbulluara në elementët e frenimit.