Gabimi në etiketim detyron Subaru-n të tërheqë mbi 541 mijë automjete

Subaru ka nisur tërheqjen e më shumë se 541 mijë automjeteve në Shtetet e Bashkuara për shkak të një pasaktësie të pazakontë në etiketën informuese të vendosur gjatë prodhimit në fabrikë.

Nuk bëhet fjalë për probleme me motorin, frenat apo pjesë të tjera mekanike. Parregullsia është konstatuar në etiketën e certifikimit, ku kapaciteti maksimal i lejuar i ngarkesës në bosht (GAWR) ishte shënuar në mënyrë të gabuar.

Në këtë tërheqje përfshihen modelet Ascent të viteve 2019–2026, Forester dhe Forester Hybrid të viteve 2025–2026, si edhe Crosstrek Hybrid i vitit model 2026.

Megjithëse automjetet vlerësohen si teknikisht të sigurta, korrigjimi i etiketave është i domosdoshëm për respektimin e kërkesave ligjore.

Pronarët do të marrin nga Subaru etiketa të reja me informacionin e saktë. Ata mund të zgjedhin gjithashtu t’u drejtohen serviseve zyrtare, ku zëvendësimi do të kryhet falas.

Rasti renditet ndër tërheqjet më të mëdha të automjeteve që nuk burojnë nga një defekt teknik, por nga një gabim administrativ dhe shtypi. Ai dëshmon se edhe një pasaktësi e vogël në dokumentacion mund të sjellë kontrollin masiv të automjeteve.