Ekrani i Tesla Cybercab ngre shqetësime për ndërhyrjet e shërbimeve emergjente

Cybercab, taksitë autonome të prodhuara nga Tesla, kanë nisur të lëvizin në disa zona të Floridës dhe Teksasit. Megjithatë, autoritetet e emergjencës në Austin kanë ngritur pikëpyetje mbi reagimin e këtyre automjeteve në raste urgjente.

Tesla u ka ofruar zjarrfikësve dhe personelit të emergjencës në Austin trajnim për ndërhyrjet gjatë incidenteve ku përfshihet një Cybercab. Komandanti i zjarrfikësve të qytetit, Matthew McElearney, ka deklaruar se mbetet i pasigurt nëse njohuritë e marra do të rezultojnë efektive në kushte reale.

Shqetësimi kryesor lidhet me ekranin me prekje që shërben për komandimin e funksioneve të automjetit. Përdorimi i tij mund të vështirësohet nga dorezat e zjarrfikësve, duart e lagura ose të papastra, ndërsa dëmtimi i ekranit apo ndërprerja e energjisë mund ta bëjnë atë të papërdorshëm.

Situata bëhet më problematike për faktin se Cybercab nuk është i pajisur me timon, levë marshesh dhe as me pedale frenimi ose gazi. Për pasojë, komandat varen nga ekrani me prekje dhe, nëse ai del jashtë funksionit, ekipet e emergjencës duhet t’i drejtohen shërbimit të Teslës për asistencë.

Dokumentacioni i Teslës për shërbimet emergjente përcakton se, në këto rrethana, pjesëtarët e ekipit duhet të mbajnë uniformën dhe të paraqesin distinktivin ose dokumentin zyrtar të identifikimit përpara një kamere të instaluar në shtyllën B të automjetit. Vetëm pas këtij verifikimi, një operator i Teslës mund t’u vijë në ndihmë, procedurë që rrezikon të sjellë vonesa kur çdo sekondë ka rëndësi.

Në të njëjtën kohë, Administrata Kombëtare e Sigurisë së Trafikut në Autostrada (NHTSA) ka nisur një hetim ndaj Teslës për pretendimet se robotaksitë e saj nuk përmbushin disa standarde federale të sigurisë, mes tyre edhe kërkesat që lidhen me mungesën e kontrolleve manuale.

Deri tani nuk është bërë publik asnjë incident në të cilin një Cybercab të ketë penguar punën e ekipeve të emergjencës. Sidoqoftë, këto shërbime paralajmërojnë se raste të tilla mund të krijojnë vështirësi serioze në të ardhmen.