BMW zgjeron ofertën e M2 me variantin xDrive

BMW ka vendosur të sjellë një ndryshim që deri pak kohë më parë do të ishte vështirë të imagjinohej për një makinë të divizionit M: M2 do të ofrohet tashmë edhe me tërheqje në të katër rrotat, përmes sistemit xDrive. Modeli ka qenë prej vitesh një simbol i makinës sportive me lëvizje nga rrotat e pasme, por preferencat e klientëve kanë evoluar.

Nisma vjen kryesisht si përgjigje ndaj kërkesës së blerësve, sidomos në vendet ku moti paraqet më shumë vështirësi. Në rajone me dimra të rëndë, përfshirë disa zona të SHBA-së dhe Zvicrën, klientët kërkonin një M2 që të mund të përdorej gjatë gjithë vitit, me më tepër stabilitet dhe siguri.

Pavarësisht kësaj risi, BMW thekson se natyra sportive e M2 nuk është cenuar. M xDrive ka aftësinë të menaxhojë shpërndarjen e fuqisë ndërmjet boshteve të përparmë dhe të pasmë sipas situatës, ndërsa drejtuesi mund ta çaktivizojë këtë sistem për ta përdorur makinën vetëm me tërheqje nga rrotat e pasme.

Nën kapak ruhet i njëjti motor 3.0 litra me 6 cilindra dhe dy turbo, i cili prodhon rreth 480 kuaj/fuqi dhe 600 Nm çift rrotullues. Përdorimi i xDrive e ul përshpejtimin 0-100 km/h në afërsisht 3.7 sekonda, pra rreth 0.3 sekonda më shpejt krahasuar me variantin me tërheqje të pasme.

Versioni me katër rrota aktive do të pajiset vetëm me kambio automatike me 8 shpejtësi. Ndërkohë, ata që preferojnë përvojën më tradicionale të drejtimit mund të zgjedhin ende BMW M2 me rrota të pasme dhe transmision manual.

Ky hap i BMW-së pasqyron transformimin e segmentit të makinave sportive, ku prodhuesit synojnë të ruajnë ndjesinë emocionale pas timonit, duke kombinuar njëkohësisht prakticitetin, sigurinë dhe performancën në të gjitha kushtet atmosferike.