BMW hap më herët porositë për i3 pas kërkesës së lartë

BMW ka njoftuar se modeli i ri elektrik BMW i3 ka ngjallur interes të jashtëzakonshëm te blerësit, ndaj lista e porosive do të hapet më shpejt nga sa ishte parashikuar fillimisht.

Ky model i ri përbën një hap të rëndësishëm në strategjinë e elektrifikimit të BMW-së dhe ndërtohet mbi platformën e re teknologjike “Neue Klasse”, me synimin për të sjellë një brez të ri automjetesh elektrike të markës.

Sipas kompanisë, reagimi i klientëve ka tejkaluar pritshmëritë, çka e ka shtyrë BMW-në të përshpejtojë procesin e porosive për këtë automjet. Ky interes i madh konsiderohet një tregues pozitiv për kërkesën ndaj modeleve elektrike, në një periudhë kur industria automobilistike po përjeton një transformim të madh drejt elektrifikimit.

BMW i3 i ri do të vijë si një sedan plotësisht elektrik dhe pritet të sjellë teknologji të avancuar, duke përfshirë bateri të gjeneratës së re, autonomi të lartë dhe karikim shumë të shpejtë.

Nga të dhënat e publikuara nga BMW, versioni i3 50 xDrive do të pajiset me teknologji 800 volt dhe mund të arrijë autonomi deri në rreth 900 kilometra sipas ciklit WLTP (vlera paraprake).

Përmes këtij modeli, BMW synon të forcojë konkurrencën në tregun e veturave elektrike dhe të rikthejë emrin i3 si një nga modelet kryesore të epokës së re elektrike të kompanisë.