BMW dhe Toyota provojnë në Spanjë benzinën tërësisht të rinovueshme

Një nismë pilot e nisur nga BMW dhe Toyota, në partneritet me Bosch dhe Repsol, do të vërë në provë automjete që përdorin ekskluzivisht benzinë 100 për qind të rinovueshme.

Prova po realizohet në Spanjë dhe ka për qëllim të vlerësojë, në rrethana reale përdorimi, mundësinë që karburantet alternative të ulin emetimet pa imponuar zëvendësimin e menjëhershëm të flotës ekzistuese të automjeteve.

Në projektin, që do të zgjasë gjashtë muaj, janë përfshirë rreth 20 makina BMW dhe Toyota. Ato do të furnizohen me Nexa 95 të Repsol, benzinë e prodhuar plotësisht nga burime të rinovueshme. Ky karburant është projektuar për motorët aktualë me benzinë dhe nuk kërkon ndërhyrje as te automjetet, as te infrastruktura ekzistuese e furnizimit.

Bosch do të ndjekë përdorimin e këtij karburanti përmes një sistemi dixhital gjurmimi. Sistemi do të kontrollojë prejardhjen dhe gjithë ciklin e tij, duke nisur nga prodhimi deri në konsumimin në automjet.

Sipas BMW dhe Toyota, industria automobilistike nuk duhet ta përqendrojë vëmendjen vetëm te një zgjidhje teknologjike, përfshirë automjetet elektrike. Të dy kompanitë theksojnë se duhet të shqyrtohen edhe opsione të tjera për uljen e emetimeve të karbonit, ndërsa karburantet e rinovueshme mund të shërbejnë si element plotësues në dekarbonizimin e transportit.

Nisma zhvillohet ndërkohë që Bashkimi Evropian po debaton për të ardhmen e sektorit të automjeteve dhe rrugët për përmbushjen e objektivave klimatike. Prodhuesit synojnë t’u paraqesin institucioneve evropiane rezultatet e projektit, si argument se motorët me djegie të brendshme mund të funksionojnë edhe me alternativa më të pastra.

Në rast se prova do të ketë sukses, benzina 100 për qind e rinovueshme mund të krijojë një mundësi për miliona automjete që janë tashmë në qarkullim, duke reduktuar ndikimin në mjedis pa e bërë të domosdoshëm kalimin e menjëhershëm te automjetet elektrike.