Bentley i drejtohet një orkestre të vërtetë për të krijuar tingullin e SUV-it të saj të parë elektrik

Heshtja e plotë mbetet një nga sfidat kryesore për makinat elektrike sportive, një problem që prodhuesit e automjeteve po përpiqen ta zgjidhin në mënyra gjithnjë e më origjinale.

Shumë entuziastë të makinave argumentojnë se pikërisht kjo mungesë tingulli u heq automjeteve elektrike atë ndjesinë e fuqishme dhe karakterin që ofrojnë modelet tradicionale me motor me djegie të brendshme.

Në këtë garë krijueshmërie, Bentley është prodhuesi më i ri që vjen me një zgjidhje të guximshme dhe pa kompromise.

Marka britanike e luksit ka angazhuar një orkestër të plotë për të riprodhuar tingullin ikonik të një motori V8 për SUV-in e saj të ardhshëm plotësisht elektrik, të quajtur Torcal, duke e pagëzuar këtë kolonë zanore si “Bentley Dynamic Symphony”.

Ajo që e bën këtë qasje veçanërisht tërheqëse është se Bentley nuk po ofron thjesht një tingull artificial motori, por po rikrijon modelet ritmike dhe tonalitetet që e bëjnë kaq të këndshme zhurmën e një motori, duke përdorur instrumente reale të interpretuara nga njerëz.

Për të kuptuar thelbin e asaj që i bën motorët e vjetër V8 kaq magjepsës për dëgjimin, skuadra e inxhinierëve të Bentley mori një motor të tillë, incizoi tingullin e tij në një studio profesionale dhe më pas e shpërbëu atë në elementët përbërës.

Bateritë u identifikuan si elementi qendror i orkestrimit, për shkak të aftësisë së tyre për të imituar më së miri pulsin dhe ndjesinë e një motori me djegie, por në këtë simfoni të pazakontë u përfshi e gjithë orkestra, duke përfshirë kitarat bas dhe violat.