Automjetet elektrike zënë një pjesë gjithnjë e më të madhe të tregut gjerman

Preferenca e blerësve gjermanë për makinat elektrike është rritur ndjeshëm. Sipas të dhënave, pothuajse një në tre automjete të regjistruara për herë të parë në gusht ishte plotësisht elektrike.

Gjatë muajit të kaluar, në Gjermani u regjistruan për herë të parë rreth 69.000 automjete tërësisht elektrike, bëri të ditur Autoriteti Federal i Transportit Motorik.

Shifra shënon një rritje prej 75.1 për qind në krahasim me gushtin e një viti më parë. Si pasojë, automjetet elektrike për pasagjerë arritën një pjesë prej 32.4 për qind të tregut.

Rritja e çmimeve të karburantit, së bashku me zgjerimin e ofertës së modeleve më të përballueshme, duket se ka ndikuar në vendimin e konsumatorëve për të kaluar te makinat elektrike.

Një rol të rëndësishëm në këtë zhvillim mund të ketë luajtur edhe subvencioni federal për blerjen e automjeteve elektrike. Aplikimet për këtë mbështetje nisën në mesin e majit dhe masa zbatohej me efekt prapaveprues për automjetet e regjistruara nga 1 janari e tutje.

Programi parashikon subvencione për blerjen ose marrjen me qira të automjeteve të reja elektrike dhe hibride. Vlera e ndihmës ndryshon në varësi të modelit të automjetit, madhësisë së familjes dhe të ardhurave.

Eksperti Constantin Gall tha se mbështetja shtetërore ka ndikuar në rritjen e fortë të kërkesës për automjetet elektrike.

Megjithatë, Gall paralajmëroi se kjo kërkesë e lartë mund të zgjasë vetëm “për sa kohë që subvencioni do të ekzistojë”. Sipas tij, më pas mund të ketë një “rënie masive të shifrave të regjistrimit”.

Në gjysmën e parë të vitit, numri i automjeteve plotësisht elektrike të regjistruara ishte gati 50 për qind më i lartë se në të njëjtën periudhë të vitit 2025.

Por kjo rritje duhet parë edhe në kontekstin e rënies së ndjeshme të shitjeve të automjeteve elektrike me bateri (BEV) gjatë vitit 2025. Për këtë arsye, përqindjet aktuale të rritjes llogariten mbi një bazë veçanërisht të ulët.

Ekspertët vlerësojnë gjithashtu se ky zhvillim mund t’u ketë kushtuar shtrenjtë tatimpaguesve.

Një nga përfituesit kryesorë të rritjes së tregut kanë qenë prodhuesit e huaj. Grupet kineze zgjeruan ndjeshëm pjesën e tyre në tregun gjerman gjatë gushtit, duke e çuar atë nga 4.4 për qind në 8.0 për qind.

“Me tkurrjen e tregut vendas dhe intensifikimin e konkurrencës, prodhuesit kinezë janë orientuar fuqishëm drejt Evropës. Gjermania, falë subvencionit aktual për automjetet elektrike, u krijon atyre kushtet ideale për ofensivën në treg”, shpjegoi Gall.

Ai shtoi se prodhuesit kinezë po përfitojnë veçanërisht në kategorinë e automjeteve më të përballueshme dhe në segmentin e tregut masiv, ku po gjejnë boshllëqe në ofertën e prodhuesve tradicionalë dhe po rrisin gradualisht pjesën e tyre.

Ndërkohë, automjetet me benzinë dhe naftë po përballen me rënie të kërkesës. Shoqata Gjermane e Industrisë Automobilistike (VDA), organizata kryesore e prodhuesve gjermanë të makinave, njoftoi se në gusht në Gjermani u prodhuan 229.900 vetura.

Ky prodhim ishte katër për qind më i ulët se në gusht 2025, në një kohë kur prodhuesit gjermanë po përballen me presion në rritje.

Kërkesa për makinat me benzinë ra me gati 38 për qind, ndërsa regjistrimet e automjeteve me naftë shënuan një rënie prej pak më shumë se 17 për qind.

Në gusht, në rrugët e Gjermanisë u regjistruan gjithsej rreth 212.500 automjete të reja. Krahasuar me të njëjtin muaj të vitit të kaluar, kjo përbën një rritje prej 2.6 për qind.

Regjistrimet nga individët privatë përbënin 40.5 për qind të totalit, ndërsa 59.4 për qind e automjeteve u regjistruan nga pronarë biznesesh. /DW/