Aston Martin shet shumicën e të drejtave të markës për të përballuar vështirësitë financiare

Nën trysninë e problemeve financiare, prodhuesi britanik i automjeteve luksoze Aston Martin ka vendosur të heqë dorë nga kontrolli i shumicës së të drejtave të markës së vet.

Në kuadër të një pakete financimi prej 550 milionë paundësh, ose rreth 738 milionë dollarë, të drejtuar nga HPS Investment Partners, kompania ka pranuar t’i transferojë grupit amerikan Authentic Brands 50.1% të të drejtave të markës për produktet që nuk lidhen me automobilat.

Përmes kësaj marrëveshjeje, emri Aston Martin ndahet në dy kategori. Kompania do ta ruajë përdorimin e tij për makinat dhe aktivitetet në Formula 1, ndërsa pjesa tjetër do të mbulojë modën, aksesorët, artikujt promocionalë dhe licencime të tjera.

E njohur për veturat sportive të luksit dhe lidhjen e saj me markën James Bond, Aston Martin prej kohësh përballet me kosto të larta zhvillimi dhe vështirësi financiare.

Kompania synon që kapitali i siguruar nga marrëveshja ta ndihmojë të vijojë aktivitetin.