Arabia Saudite prezanton Exobot, dy automjete elektrike me dizajn futurist

Arabia Saudite ka ndërmarrë një hap të rëndësishëm drejt krijimit të një industrie të vetën automobilistike, duke prezantuar automjetet e para të markës vendase Ceer. Bëhet fjalë për dy modele plotësisht elektrike, me pamje futuriste që të kujton skenarët e filmave fantastiko-shkencorë.

Të dyja makinat mbajnë emrin Exobot dhe ofrohen në version sedan dhe SUV. Marka Ceer u themelua në vitin 2022 nga Fondi i Investimeve Publike i Arabisë Saudite (PIF) në partneritet me Foxconn, në kuadër të strategjisë së Mbretërisë për të zhvilluar prodhimin vendas të automjeteve.

Gjatë kësaj periudhe, kompania ka ndërtuar aftësitë e saj në inxhinieri dhe prodhim, ndërsa në këtë proces ka bashkëpunuar me BMW-në dhe një rrjet të gjerë furnitorësh ndërkombëtarë.

Exobot sedan dhe Exobot SUV janë ndërtuar mbi të njëjtën platformë modulare elektrike. Të dyja dallohen për dimensionet e mëdha, vijat e theksuara në formë pyke, ndriçimin e hollë dhe xhamin e përparmë gjigant, i cili është 2.4 metra i gjatë.

Sedani ka gjatësi prej 5.26 metrash, ndërsa SUV-i arrin 5.02 metra. Gjerësia e të dy modeleve është 2.1 metra, transmeton Telegrafi.

Gjuha e dizajnit përfshin edhe referenca të drejtpërdrejta ndaj trashëgimisë saudite. Sipas Ceer, format e mprehta të karrocerisë janë marrë nga arkitektura e lashtë e Hegra-s, ndërsa 32 elementet e sistemit të ndriçimit simbolizojnë vitin 1932, kur u bashkua Mbretëria e Arabisë Saudite.

Vëmendjen kryesore e marrin dyert e quajtura Shahin Wing Doors. Ato janë pothuajse tre metra të gjata dhe ngrihen lart, duke përshkruar një hark prej rreth 60 centimetrash. Frymëzimi vjen nga fluturimi i skifterit Shahin, ndërsa hapja mund të komandohet përmes çelësit ose kontrolleve të integruara në dyer.

Ceer thekson se kjo zgjidhje ndryshon nga dyert tradicionale gullwing, pasi krijon qasje si për udhëtarët në pjesën e përparme, ashtu edhe për ata që ulen pas.

Brendësia vijon me të njëjtën frymë avangarde. Kabina përmban një timon në formë ylli, teknologji steer-by-wire dhe xhama të vendosur në pjesën e poshtme të dyerve, të cilët mund të kalojnë nga transparentë në opakë me një prekje të vetme.

Edhe specifikat mekanike janë mbresëlënëse. Të dy Exobot përdorin nga tre motorë elektrikë dhe sistem tërheqjeje në të katër rrotat, ndërsa konfigurimi fillestar zhvillon deri në 850 kuaj fuqi.

Versioni sedan përshpejton nga 0 në 100 km/h për 2.6 sekonda, kurse SUV-i e përfundon të njëjtin sprint për 2.9 sekonda. Motorët e boshtit të përparmë prodhohen nga Hyundai Transys, ndërsa ai i pasmi nga Rimac.

Energjia sigurohet nga bateri NCM me kapacitet 112 kWh dhe një arkitekturë elektrike 800 volt. Sipas të dhënave të kompanisë, karikimi nga 10 në 80 për qind zgjat më pak se 30 minuta.

Autonomia e deklaruar është deri në 670 kilometra për sedanin dhe 560 kilometra për SUV-in, bazuar në ciklin NEDC. Megjithatë, këto rezultate nuk mund të krahasohen drejtpërdrejt me matjet WLTP ose EPA, ndaj distanca e arritshme në përdorim real pritet të jetë më e vogël.

Ceer po përgatit gjithashtu një konfigurim edhe më të fuqishëm të Exobot. Varianti kryesor do të ofrojë 1,111 kuaj fuqi dhe 1,500 Nm çift rrotullues.

Me këtë fuqi, sedani do të arrijë 100 km/h për 2.1 sekonda dhe shpejtësi maksimale prej 250 km/h. SUV-i do të përshpejtojë në 2.4 sekonda dhe do të ketë shpejtësi maksimale prej 210 km/h.

Hapi i parë në treg do të jetë versioni First Edition, i cili do të paraprijë variantin Plus. Ky konfigurim do të ketë 850 kuaj fuqi, 1,000 Nm çift rrotullues, bateri 112 kWh, kabinë të veshur me lëkurë Nappa kuqezi, detaje të veçanta në pjesën e jashtme dhe një pllakë të numërtuar, të lidhur me numrin VIN të automjetit.

Plani i Ceer shkon përtej këtyre dy makinave. Deri në vitin 2030, kompania synon të prezantojë gjithsej shtatë modele, duke përfshirë automjete më të vogla e të mesme, si dhe zgjidhje të ndryshme për sistemet e shtytjes.

Marka ka bërë të ditur se gama e ardhshme nuk do të kufizohet vetëm te automjetet elektrike. Në rast se konsumatorët shfaqin kërkesë, kompania synon të ofrojë edhe modele me motorë me djegie të brendshme.

Prodhimi i të gjitha automjeteve është planifikuar të zhvillohet në kompleksin e Ceer në King Abdullah Economic City. Kompania e cilëson këtë objekt si kompleksin më të madh të prodhimit të automobilëve në Lindjen e Mesme.

Për rrjedhojë, Exobot përfaqëson më shumë sesa një automjet elektrik me pamje të pazakontë. Për Arabinë Saudite, modeli është pjesë e një plani më të gjerë për ngritjen e një industrie automobilistike që projektohet, ndërtohet dhe zhvillohet brenda vendit. /Telegrafi/